Wir graf Ott vnd graf Ru^odolff bru^eder grafen von Ortenburch vergehen offenlich mit disem brief fu^er vns vnd fu^er v^enser erben vnd tun chunt allen den di jn sehent ho^erent oder lesent, daz wier mit wol bedahten mu^et recht vnd redleich vnd vnuersprochenlich den erbern levten hern Fridreich vnd Haugen seinem bru^eder den purkgrafen von Lientz iren wirtinn vnd iren erben su^enen vnd tochtern vnd allen iren erben versaczt haben vnser vest Hohenburch vnd achtzch march geltes ze fro^emer chost nach herren gu^elt gerait vnsers vrbares vnd gu^etes hu^eben vnd zehent vogtay wie daz genant ist als daz vrbarpu^ech sait, daz wir jn jngeanturt haben da derselb gelt aller angeschriben stet, der gelegen ist zwischen Chellerperch vnd Greyffenberch vnd des Choetspergs, levt vnd gu^et, besu^echt vnd vnbesu^echt, gepawen vnd vngepawen vnd mit allen rehten die dazu^e geho^erent, als wirs selb innen gehabt haben, wie die genant sind, vmb sechs vnd zwaintzch hundert guldein vnd vmb sechs vnd sechtzch gu^eter guldein die di wag wol habent, vnd viertzch agleyer phenning, der wir gar vnd gaentzlich von in gericht vnd gewert sein mit solhen gelu^ebden, swenne wir oder vnser erben sev oder ir erben ermanen ye yaerlich vor sand Geo^ergen tag mit sechs vnd zwaintzch hunder guldein vnd mit sechs vnd sechczch gu^eter guldein die di wag wol haben, vnd mit virczch aglayer phenning, so sind vns vnd vnsern erben von in vnd von iren erben die vorbenante vest Hohenburch vnd die achtzch march geltes gar vnd gaenezlich ledich worden den vnd vns her wider angeuallen mit allen rehten, als wir jns geanturt haben an allen chrieg vnd an alle widerred, vnd su^ellen wir jn danne die vorgenanten guldein anturten ze Gemu^end in der stat. Waer aber daz wir ez von in nicht lo^esten vor sand Geo^eren tag, welhes jares daz ist, so ist in der nutz desselben jares gaenczlich veruallen. Auch loben wir jn, daz wir jn die vorgenanten vest Hohenburch vnd den egenanten gelt schermen vnd vertretten su^ellen fur alle ansprach nach lands reht in Cherenden an allen iren schaden. Auch su^ellen wir jn jaerichleich ze purchhu^et geben zu der vorgenanten vest Hohenburch zwelff march agleyer phenning vnd vir hundert chaes vnd roken zehen mu^ett, gerst vnd hirs zehen mutt, vnd haber zehen mutt vnd daz paw^e vnd daz wismat, daz zu der vorgenanten vest geho^ert. Vnd su^ellen wir sev derselben pu^erchhu^ot alle jar richten vnuertzogenlich halb auf sand Marteins tag vnd halb auf sand Georgen tag, vnd su^ellen si die vordern ze Ortenburch an vnserm purkgraf. Auch mugen si durch ir no^etdurfft den vorgnanten gelt gar oder ainen tail versetzen oder schaffen mit vnserm guten willen in allen den gelu^ebden als si jn von vns habent, denn alain dem pischoff von Saltzburch noch den von Go^ertz nicht. Waer auch, ob jn an den vorgnanten achtzch march geltes icht abgieng vnd min praecht denn wir sev geweist haben, daz su^ellen wir jn auch erstatten mit anderm gelt, swenne si daz an vns bringent mit ainer gewizzen an verziehen. Auch haben wir vns selben auzz getzogen vnd behalten daz gericht auf denselben gu^etern so beschaidenlich, daz si ze richten haben als ander erber leyt, die auch satz von vns habent. Waer auch daz wir ze chrieg wurden mit dem bischof von Saltzburch oder mit vnsern o^eheimen von Go^ertz, habent si auch gen vns auzz genomen, daz si vns mit der vorgenanten vest Hohenburch wider dieselben zwen herren nicht zu^e legen su^ellen noch vns wider sev da mit nicht warten. Waer aber, daz wir der vorgnanten vest Hohenburch gen yeman ander bedo^erfften, so sullen si vns da mit gewertich sein vns vnd vnser diener auzz vnd in ze lazzen ze vnsrer no^etdurfft jn an allen iren schaden, vnd su^ellen vns mit der vest Hohenburch gen aller maenchleich gewertich vnd vns offen sein, denn wider den von Saltzburch noch wider die von Go^ertz nicht. Daz in daz staet vnd vnuerbrochen beleybe, geben wir jn disen offenn brief zu aim v^erchu^end der warhait vnd gantzer staetichait diser sache, besigelten mit vnser paider vo^ergenanten graf Otten vnd graf Ru^odolfs||
bru^eder grafen von Ortenburch anhangunden jnsigeln. Der geben ist zem Spital, do nach Christs gebu^erde ergangen waren drewzehen hundert jar dar nach im new^en vnd fu^emftzgistem jare am nahsten phincztag nach sand Margreten tag.

Source Fulltext: OÖUB 7 (Wien 1876), S. 651ff., Nr. 642