Ich Gunther der spitaler an dem Pyern vergich offenlich umb den auzwechsel, den ich mit dem edeln ersamen herren hern Eberhart von Waltse von Lintz zden zeiten haubtman ob der Ens getan han also, daz ich im und sein eriben recht und redleich gegeben han di guetn ze Sauta^ern gelegen bei Slyrbach mit aller zuegehorung aus meiner und meines gotzhaus datz dem Spital nutze und gewer in di irn, dawider er mir und meim vorgenanten gotzhaus gegeben hat di Swaig genant di Rosenaw^e mit aller zuegehorung ze holz und ze veld und di er mir und mein obgeschriben gotzhaus ze eim widerwechsel fur di obgenanten gueter ze Sauta^ern gegeben hat. Ich vorgenanter Gunther der spitaler vergich auch, daz ich und mein nachchomen der vorgenanten gueter ze Sauta^ern ir gewer sein fur alle ansprach swo in des not und durft geschiecht also des lantes recht ist in Osterreich und ob der Ens. Und daruber ze einer steten warhait und urchund gib ich vorgenanter Gunther der spitaler disen offen brief besigelten mit meim anhangundem insigel, der gegeben ist von Christi gepu^erd dreutzehen hundert iar darnach in dem neun und funftzigisten iar des sunntags an sand Cholmanstag.

Source Fulltext: OÖUB 7 (Wien 1876), S. 665, Nr. 655