ICH Herman zv^o den zeiten pharrer dacz Amsteten vergich offenleich, daz mer der erber herre her Reinprecht von Walse vnd sein erben geben habent vnd meinen nachchomen seins freyn aygens ein phunt geltz in Zeidlinger pharr gelegen genant dacz Dietreichen auf Perg fuer daz opher, daz einem pharrer dacz Amsteten von der chappell dacz Sewsenekk geuallen solt also, daz ein chappellan dacz Sewsenekk in der chappell fu^erbaz ewichleich alle su^entag die heiligen zeit chvnnen sol vnd den weychpru^en gesegen sol vnd daz weychsalcz, vnd sol die laevt in dem haus mit go^etezleichnam beru^echen vnd sol auch die laevt die ze naegst dem haus gesezzen sint mit go^etezleychnam berv^echen, vnd sol ich vnd mein nachchomen, ez sein pharrer oder vicari die auf der chirchen dacz Amsteten gesezzen sint, da wider fu^erbazz ewichleichen dhain widerred haben. Vnd ist daz geschehen nach der erbern pharrlaevt rat in dem marcht vnd auf dem gewe, vnd sol auch ewichleich wer auf dem egenanten guet auf dem perg gesezzen ist, raychen ein vogthu^en an vnser vrowen tag ze der dienst (zeit) alle iar dem erbern herren her Reinprecht von Walse vnd seinen erben. Daz die red also staet vnd vnuerchert beleibe, darvber gib ich dem erbern herren hern Reinprecht von Walse vnd seinen erben den prief ze einem offen vrchund der warhait versigelt mit meinem anhangvndem insigel, vnd sint dez zevg Vlrich der Leychkkerstorffer vnd Hainrick der Pernnaw^eer mit iren anhangvnden jnsigeln in an schaden. Der prief ist geben do man zalt drevzehen hundert iar darnach im sechzzigstem iar an sand Georgen tag.

Source Fulltext: OÖUB 7 (Wien 1876), S. 695, Nr. 689