ICH Wolfkanch von Winden vnd ich Eberhart vnd ich Pu^erchart die pru^eder von Winden sein vetern vnd hern Purcharts su^en von Winden dem got gnad wir vergehen vnd tun chunt, daz wir mit vnsers lehenherren hant dez hochwirdigen fu^ersten byschof Leûpolts von Pabenberch recht vnd redleichen verkawft vnd geben haben vnsers rechten lehens daz wir von im ze lehen gehabt haben vnsern hof gelegen ze Linthaim, vnd allez daz gut daz wir gehabt haben zdem Geraewt auf der Swarczgrueb, vnd allez daz daz zu dem vorgenanten vnserm hof geho^eret vmb hundert phunt wienner phenning der wir gar vnd gaenczleich gewert sein, vnserm o^ehaim Gundakchern von Tannberch vnd seinen erben fu^erbaz ledichleichen vnd vreileichen ze haben vnd allen irn fru^emen damit ze schaffen. Waer aber, daz der selb vnser o^ehaim Gundakcher von Tannberch abgieng vnd an leiberben verfu^er dez Got nicht geb, so sullen denne die vorgenanten gu^eter alle erben vnd geuallen auf seinen o^ehaim Ru^egern von Starchenberch vnd auf dezselben Ru^egers veter Ru^egern hern Gundakchers sun von Starchenberch dem Got gnade vnd auf ir erben an allen chrieg. Vnd wand die vorgenanten mein zwen vetern Eberhart vnd Purchart von Winden noch zu irn iarn nicht cho^emen sint, darvmb so secz ich mich vorgenanter Wolfkanch von Winden mitsampt allen meinen erben vnuerschaidenleichen fu^er mich vnd fu^er die egenanten mein zwen vetern vber die vorgenanten gu^eter alle dem egenanten vnserm o^ehaim Gundakchern von Tannberch vnd seinen erben als vorgeschriben stet ze rechten gewern vnd scherm fu^er alle ansprach alz lehens recht ist vnd dez landes recht ze O^esterreich, vnd auch als lang, vncz daz die vorgenanten mein zwen vetern zu irn rechten iarn cho^ement vnd sich der vorgenanten gu^eter aller gar vnd gaenczleich verczeichent aufgebent vnd bestaetigent als lehens recht ist vnd dez landes recht ze O^esterreich. Vnd daz diser chawf fu^erbaz also staet vnd vnzerbrochen beleib, darumb so gib ich Wolfkanch von Winden fu^er mich vnd fu^er mein erben jn disen brief ze einer ewigen vestnunge diser sache versigelten mit meinem jnsigil vnd mit hern Hainreichs insigil von Walsse hauptman ze Drosendorff vnd mit hern Jansen von Chappelle, die diser sache gezewg sint mit irn jnsigiln. Der brief ist geben ze Wienne nach Christes gebu^erd drewczehen hundert iar darnach in dem sechczgisten iar an sand Bartholomes tage.

Source Fulltext: OÖUB 7 (Wien 1876), S. 717f., Nr. 714