Ich Mychel der Polan vnd mein hawsvraw vnd all mein erben wir veriehen, daz wir ze chawffen haben geben vnsern hof ze Alhartsperg in der pharr ze Saechsen Hansen dem Chaezzlein vnd Angnesen seiner hausvrawn vnd allen iren erben fuer vreiz aygen vm aht phunt phenning wienner mu^enz, der wir ganz vnd gar geriht vnd gewert sein ze rehten têgen an allen schaden, vnd schullen auch ich vnd mein erben des hofs vnd des aygens ir gewer vnd scherm sein an aller stat wo in sein dwrft geschiht nach landes reht in Osterreich. Vnd ich nicht aygens jnsygels han (sic), so verpint ich mich alles das vorgeschriben stet staet ze haben ich vnd mein erben vnder meins gena^edigen herren insygel hern Chraften des Hawser, der daz doran gehangen hat dwrch vnser payder pet willen, vnd mit Chunrats jnsygel zden czeiten rihter ze Grein. Daz geschach nach Christi gepw^ertt tawsent iar drewhundert iar darnach in dem sechzigstem iar an des trewn herren sand Nyclas tag.

Source Fulltext: OÖUB 7 (Wien 1876), S. 730f., Nr. 728