Allen Gottes getrewen die nu lebent oder hernach chunftig sind zu^e der chuntschaft oder angesicht diser brief iemer pracht wirdt die in nu oder hienach lesent oder ho^erent lesen ewiklich. Wir Wernhart der eltist graf von Schowenherg und wir Ulreich und Hainreich gepru^eder ouch grafen von Schowenherg weilnt graf Hainreichs von Schowenherg seliger gedechtnuzze unsers lieben herren und vatters des vorgenanten unsers vettern graf Wernharts bru^eders su^ene unsern gru^os und erchantnu^ezz diser nachgeschriben dinge. Elich getat ebent weis leut mit briefes hantfest der sy recht und redlich koment uberain, durch daz darnach in kunftigen zeiten mit chrieges anfacht icht sto^ezze oder irrsal darin vallen. Darumb so wizzen alle leut und besunder die den ez ze wizzen durft beschicht, daz wir die vorgenanten Wernhart U^elreich und Hainreich grafen von Schowenherg fu^er uns und fu^er alle unser nachkomen und erben ewikleich nach gu^eter vorbetrachtung willichlich mit rechter wizzen zu^e den zeiten und an den stetten do und da wir ez mit recht wol getu^en mochten nach wizzen und rate unserer pesten freunde und der erberisten unserer mannen ratgeben und diener mit aller der ordnung beschaidenhait und chraft worten und geperden die nach geistlichen und weltlichen rechten und nach freihaiten oder gewonhaiten der lannde dhains weegs dartzu^e geho^erent, durch frides gemaches und nuczes willen unser selbers und aller unserer getrewen undertanen und sunderlich durch ain merklich ufnemen an eren und wirden unsers namens und aller unserer herschaften mit dem hochgeporn durchleuchtigen fursten unsern lieben gnedigen herren herczog Ru^odolf als dem eltisten herczog Friderich herczog Albrecht und herczog Leupolden gepru^edern herczogen ze O^esterreich ze Steyr und ze Kernden etc. von besunderer trewe und liebe wegen die wir durch freuntschaft der gepurd und des geschlechtes als baiderseit unser vordern und wir von alten zeiten und noch zu^e ainander natu^erlich verphlichtet sind billich zu^e in haben sullen und wellen, u^eberainchomen sein und uns gen in und allen irn nachkomen und erben herczogen zw^e O^esterreich bechant haben wizzentlich so^elicher sache tayding und stuke als hienach begriffen ist. Des ersten haben wir bechant wizzentlich und verjehen offenlich mit disem brief, als wir des geweiset sein mit gu^eten gerechten brieten die si habent von ro^emischen kaysern und kunigen, daz wir nach den freyhaiten und rechten, als das edel herczogentu^em. ze O^esterreich gestiftet gewirdet und von alter herkomen ist, ze rechtem leben von alter gehebt haben und fu^erbazzer haben sullen eweklich den pan der grozzen gerichten uber den tod in den geschriben unsern landgerichten die wir selber innehaben und die ouch ander erber herren von uns ze lehen habent, das ist ze merken u^eberal in dem lantgericht genant Starchenberger gericht da die stat Wels innegelegen ist. Darnach in dem lantgericht genant in dem Tu^onnaw^etal und in dem Trawngew, das unsern vordern und uns bei alten zeiten ledig warden ist von weilent den alten Kappellern da die stat Lyncz inne gelegen ist. Darnach in dem lantgericht genant Weizzenberger gericht, da der markcht Swans inne gelegen ist. Darnach in dem lantgericht das Lienhart der Mo^erspek von uns ze lehen hat, und auch in dem lantgericht das Wolfhart der Pollhaimer von uns zelehen hat, und daru^eber sunderlichen in der stat ze Veklaprukh und auf allen andern stetten merkten und do^erffern leutten und gu^etern die die vorgenanten unser herren von O^esterreich jeczunt habent allenthalben ob der Ens, si sein ledig oder versaczt, da wir die vorgenanten von Schowenberg ze richten haben umb den tod. In disen vorgeschoben unsern lantgerichten allen und auch auf allen der egenanten herren von O^esterreich stetten merkten und do^erffern leutten und gu^etern di si jetzunt habent ob der Ens da wir den pan von denselben unsern herren von O^esterreich ze leben haben, mu^egen wir selber oder unser nachkomen und erben uf die dieselben lehen vallent wol gerichten umb den tod. Waz amptleut aber wir uber dieselben gericht seczen, die sullen den pan enphahen und nemen von den obgenanten unsern herren von O^esterreich und von allen irn nachkomen und erben herczogen zw^e O^esterreich ie von dem eltisten under in, der denn in landes ist, und sol ouch der denselben pan verleihen richteklich und unverczogenlich jegklichem unserm amptman den wir in dem namen als da vor darczu^e seczen au alle widerred und geverd. Daruber sullen ouch die vorgenanten Lienhart der Marspek Wolfhart der Polhaimer und alle ir nachkomen und erben an den egenanten lantgerichten eweklich und ouch alle ir amptleut die sie u^eber dieselben ir lantgericht seczent den pan ze gleicher weis als wir und unser amptleut ouch nemen und emphahen von den egenanten unsern herren von O^esterreich, die in den ouch leihen sullen zegleicher weis als uns und unsern amptleuten unverczogenlich an alles geverd als oft es an si gevordert wirdt, wan weder dieselben herren noch ir amptleut daselbs nicht recht habent ze richten u^eber den tod, ee daz si den pan von den herczogen von O^esterreich nement und emphahent. Ouch sullen dieselben unser herren die herczogen von O^esterreich und alle ir nachkomen und erben eweklich in den vorgenanten fu^emf lantgerichten als lang und als weit die begriffen habent, und daru^eber auf allen irn stetten merkten und do^erffern leuten und gu^etern die si jeczunt ob der Ens beseczen und haben ir muncz irn ungelt und alle ander aufsecz ze gleicher weis als in irm lande niderhalb der Ens. Wir die vorgenanten grafen von Schowenberg haben ouch bechant fu^er uns und alle unser nachkomen und erben und bechennen wizzentlich in dem namen und nach dem rechten als da vor geschriben stat als wir des ouch underweiset sein, recht und redlich, waz herschaft vesten purg stett merkt do^erffer gericht vogtei zehent leut und gu^eter von uns lehen sind, die herren ritter und knecht, purger und landleut oder jemant ander in dem lande ze O^esterreich under der Ens und ob der Ens jetweder seit der Tu^onaw in allen der egenanten unserer herren von O^esterreich gerichten und gepieten und ouch in allen unsern herscheften und gerichten oder gepieten uncz an die gemerk die wir haben mit der herscheft von Bayrn und ouch in den landen ze Steyr und ze Kernden von uns ze lehen habent, daz wir dieselben leben alle gar und genczlich wo die gelegen und wie die genant sind voran und des ersten ze lehen haben und haben sullen und wellen eweklich von den egenanten unsern herren den herczogen von O^esterreich, von den wir die emphangen haben und ouch ir man darumb sein als landes und lehens recht ist an allez geverd, auzgenomen alain der lantgericht die wir ze leben haben von dem byschof und dem goczhaus von Pabenberg die wir unz selber unverwandlet behabt haben, doch also, daz die vorgenanten unser herrenvon O^esterreich und alle ir nachkomen und erben eweklich den pan der grozzen gericht u^eber den tod haben und leihen, und ouch ir muntz irn ungelt und all ander aufsecz da beseczen sullen alain in den egenanten fumf lantgerichten in aller der mazz als vorgeschriben stat wan si des recht haben an all widerred und geverd, wan ouch die vorgenanten unser herren die herczogen von O^esterreich nach der stiftung und wirdekait desselben irs herczogentu^ems ze O^esterreich solich freyhait und recht habent, swaz herschaft und vesten leut und gu^eter die von phaffenfu^ersten lehen sind an si koment, die in jemant zu^efu^egen und antwu^erten wil von koufes gabe gescheftes oder dhainer ander zu^evallung wegen, daz si die mit recht ob halt die lehenherren nicht zegegen weren wol aufnemen und sich ir underwinden und si recht und redlich besiczen mugen doch also, daz si die von den phaffenfu^ersten und den goczheusern von den si rurent bechennen ze lehen und si dafu^er emphahen und haben, als in ouch die phaffenfu^ersten die schuldig sint ze leihen. Darumb und ouch durch unsern freyen willen von soliher redlicher sache und erber rechter taiding wegen der wir mit den vorgenanten unsern herren von O^esterreich wizzentlich uberainkomen sein, haben wir die obgenanten grafen von Schowenberg fu^er uns und alle unser nachkhomen und erben eweklich unsers rechten lehens von unserm herren dem byschof und dem erwirdigen goczhaus ze Regenspurg die herschaft und resti ze Ort mit leuten manscheften gaistlichen und weltlichen lehen mit gu^etern gerichten merkten do^erffern ho^efen ho^elczern gevilden wleiden und gemainlich mit allen nu^eczen und rechten die darczu^o geho^erent aufgegeben und ingeantwu^ert recht und redlich den obgenanten unsern genedigen herren den herczogen von O^esterreich und allen irn nachkomen und erben an demselben lande eweklich, den wir dieselben herschaft und vesti ze Ort und swaz darzu^o geho^eret gevertigt haben recht und redlich, und haben ouch die aufgesant und senden si auf mit disem brief unserm gnedigen herren dem byschof von Regenspurg den wir gepeten haben und bitten ouch mit disem brief, daz er der egenanten herschaft und resti ze Ort mit aller zu^egeho^erung gu^enne den obgenanten unsern herren von O^esterreich in lehensweis von im und dem goczhaus ze Regenspurg eweklich, und in die verleihe nu und hienach wann und wie oft es ze schulden chumpt als das pilleich und recht ist an alle widerred und geverd. Nach diser aufgebung und vertigung als vor geschriben stat habent die vorgenanten unser herren von O^esterreich uns den egenanten grafen von Schowenberg und allen unsern erben furbazzer verlihen ze rechtem lehen die obgenant herschaft und vesti ze Ort und swaz darczu^o geho^eret als vorgeschriben stat, und haben ouch wir die von in emphangen und sein ir man darumb worden als landes und lehens recht ist an allez geverd. Wer aber daz die vorgenanten von Schowenberg abgiengen on erben su^ene des Got nicht welle, so sullen dieselben lehen erben und gevallen auf to^echtern dezselben namens und geschlechtes in aller der mazz als ob si su^ene wern. Und sullen ouch unser herren von O^esterreich die verleihen denselben to^echtern ze gleicher weis als su^enen ane geverd alz oft sich die hand verwandelt an der egenanten unser herschaft von O^esterreich oder an uns den vorgenanten graf Wernharten graf Ulreichen und graf Hainreichen von Schowenberg, als oft sol ein jeglich herczog von O^esterreich den es denne ze recht angeho^ert die vorgenanten lehen alle verleihen richteklich und unverczogenlich an alle widerred und geverd dem oder den grafen oder grefinn von Schowenberg, auf den oder auf die danne dieselben lehen pilleich und durch recht erben und gevallen sullen es sein sune oder to^echter als vorgeschriben stat, und sullen si uns die von Schawenberg man und weib sune und to^echter daran nicht irren, sunder si sullen uns dabey schirmen und beleiben lazzen als landes und lehens recht ist on allez geverd. Wan ouch wir die vorgenanten grafen von Schawenberg fu^er uns und alle unser nachkomen und erben eweklich mit manschaft und mit dienst komen sein hinder die obgenanten unser herrn die herczogen von O^esterreich und hinder all ir nachkomen und erben, darumb habent si fu^er sich selber und fu^er all ir nachkomen und erben uns verhaizzen vesteklich mit irn triwen und mit irn versigelten briefen, daz si uns in dem namen als da vor eweklich schirmen, versprechen und vertreten sullen und wellen alz ir man und diener wider aller menklich nieman auzgenomen, bei allen unsern freyhaiten rechten und gu^eten gewonhaiten und mit namen bei allen unsern herscheften vesten purgen stetten leuten gerichten und gu^etern wo wir die jeczunt haben oder furbazzer gewinnen under der Ens und ob der Ens in Osterreich und in Payrn oder anderswa wie di genant oder wa si gelegen sind vor allem gewalt und unrecht an allez geverd. Und dawider haben wir die obgenanten grafen von Schowenberg mit rechter wizzen ouch gelobt und verpunden vesteklich mit unsern triwen an aydes stat und verpinden uns ouch recht und redlich fu^or uns und alle unser nachkomen und erben eweklich mit kraft dicz gegenwurtigen briefs, daz wir und alle dieselben unser nachkomen und erben mit allen unsern herscheften und vesten purgen und stetten leuten und dienern die wir nu haben oder hienach gewinnen in O^esterreich und in Payrn oder anderswa wo die gelegen oder wie die genant sind oder werdent, dienen beigestendig und behulffen sein sullen und wellen mit aller unser macht eweklich den vorgenanten unsern herren den herczogen von O^esterreich und allen irn nachkomen und erben herczogen ze O^esterreich wider aller menklich nieman auzgenomen getriwlich und furderlich, und auch behalten ire lantrecht und alle ir freyhait und gu^et gewonhait in aller der mazz als die von alter herkomen sein an allez geverd. Wenn aber die vorgenanten unser herren von O^esterreich oder ir nachkomen und erben bedurften unser oder unserer erben und nachkomen dienstes auzzerhalb irm lande ze O^esterreich, so sullen si uns nach gelegenhait der sache und des dienstes darumb geben und tu^en als vil, als nach unsrer vorderung und antwurtt baidenthalb darumb sprechent und erchennent ungeverlich bei irn triwen vier erber man der egenanten unserer herren von O^esterreich geschworn rates der si zwen und ouch wir die egenanten von Schowenberg zwen darczu^e nemen und seczen sullen. Wer aber daz geleich zwen gegen zwain gestiezzen und mizzhell wurden, so sullen dieselben vier ainen obman zu in nemen auch auz der obgenanten unsrer herren von O^esterreich geswornen rate der si uns baidenthalb aller gemainest dunke an geverd, und swaz dann die fumf gemainlich oder der merer tail under in darumb sprechent und erkennent bey irn triwen, daran sol uns baidenthalb wol genu^egen, und sullen ouch das jetwedrer seit volfu^eren und stet haben an alles geverd. Umb dise vorgeschriben taiding daz ist ze merken sunderlich umb die manschaft der herschaft und vesti ze Ort und umb die puntnuzz und dienst der wir in dem namen als da vor eweklich phlichtig und gepunden sein der egenanten unsrer herschaft von O^esterreich hat uns der durchleutig fu^erst unser gnediger herre herczog Ru^edolff von O^esterreich an sein selbs und an aller seiner pru^eder stat die vorgenennet sind gegeben ein so^elich erber namlich und grozz gu^et an beraitem gelt das uns und allen unsern nachkomen und erben tro^estlich hilflich und fu^erderlich iemer sein mu^ezze. Hiebey warn die diser sache sind getzeuge, die erwirdigen herren her Paul byschof ze Freysing her Peter byschof ze Chur und her Johans byschof ze Gurk des obgenanten unsers herren hertzog Ru^odolfs von O^esterreich kantzler, darnach die edeln und erbern graf Tyebolt von Newenburg her ze der Il und ze Blamont graf Purchart und graf Perchtolt von Maidburch vettern graf Ulreich von Cyli Stephan von Meissow obrister marschalch Alber von Pu^echhaim obrister drugsa^ecz Haedenreich von Meissow obrister schenk Peter von Eberstorf o^ebrister kamrer Wilhalm von Chrenspach o^ebrister ja^egermaister in O^esterreich Eberhart von Walsse von Lyncz ze den zeiten houptman ob der Ens Leutolt von Stadek ze den Zeiten lantmarschalh in Österreich Eberhart von Chapell ze den zeiten hauptman ze Ens Jans von Trawn ze den zeiten houptman ze der Freynstat Hainreich von Walsse von Drosendorff Eberhart von Walsse von Grecz Friderich von Walsse von Ens Eberhart von Dachsperg Ulreich und Seyfrid von Chranichperg Hainreich von Ratpach hofmaister Hainreich von Prunne hofschenkch Hans der Lozzperger hofmarschalh Wilhalm der schenkch von Liebenberg speizmaister des vorgenanten unsers herren herczog Ru^odolfs von O^esterreich und ander erber leut genu^eg. Und daruber ze ainem waren vesten offenn und ewigen urchunt geben wir die vorgenanten Wernhart Ulreich und Hainreich grafen von Schowenberg fu^er uns und alle unser nachkamen und erben die wir darczu^e binden wizzentlich den obgenanten unsern herren den herczogen von O^esterreich und allen iren nachkomen und erben eweklich disen brief versigelt mit unsern anhangunden insigeln. Dis ist beschenen und ist der brief gegeben ze Weytra an dem nechsten mitichen nach sand Veits tag des jares do man zalt von Christs gepu^erd tausend drewhundert sechczig jar darnach in dem ersten jar.

Source Fulltext: OÖUB 8 (Wien 1883), S. 27ff., Nr. 30