Wier Rudolff von Gotes gnaden herczog ze O^esterreich ze Steyr vnd ze Kernden tu^en kunt mit disem brief, das unser getrewr lieber Zachreis von Hader zu uns kom und tet uns ze wizzen, wie sein vatter sa^eliger Walchun von Hader die vestte ze Piberstain in Wechsenberger gcricht mit aller seiner zugehorung von unserm sa^eligen vatter ze lehen genomen hiet und wie er im dieselben lehen und auch dew brief die er von Ulreichen dem Tanner daruber hiet mit seinem brief bestatt hiet, und lie uns dieselben brief paid ho^eren und pat uns, das wier im auch verlihen seind sein vatter mit dem tod abgegangen wa^er, das haben wier getan und haben im und seinen erben dasselb vorgenant haus Piberstain mit aller seiner zugehorung verlihen und verleichen im das wizzenleich mit krafft dicz briefs, also lehens und des lanndes recht ist ze Osterreich, und bestetten in dieselben vorgenanten lehen und brief die si daru^eber habent mit disem unserm gegenburtigen brief, der geben ist ze Wienn an unser frown abent ze der liechtmesse nach Krists gepu^erd drewczehenhundert jar darnach in dem zwai und sechczigistem jar. + Hoc est verum. +

Source Fulltext: OÖUB 8 (Wien 1883), S. 60, Nr. 58