Ich Haintzel der Zeller und ich Christel der Zeller Stephans dez Zeller sun von .... vergehen .... daz wir .... ze chawffen haben geben .... ab der Renoltzleiten und seiner hawzzvrawn Elspeten und ir paider erben unser gu^et datz Winttensach (? verwischt), daz gelegen .... Reper pharr, da ze den zeiten Hanns awff gesezzen ist umb ein gelt des si uns gericht und .... habent ze einem rechten eribrecht also dez landes recht ist, also beschaidenleich, daz si uns all jar ja^erleich davon dienn und geben schu^elln an unser vrawntag ze der dienstzeit viertzehen schilling pazzawer phenning di dann gib und geb sint, und zwai hu^enrr und ze dem diensttag nicht mer, und wer daz sich ein todrecht da verviel, der schol ze todrecht geben zwen und dreyzzich phenning, und wer awffvert der schol geben zwen und dreyzzich phenning, und wer abvert der schol geben zwen und dreyzzich phenning und ze jeder hochzeit zwen cha^es und schol jeder cha^es vier phenning wert sein, si schu^ellen auch in unser stift gen mit zwain hu^enrrn und an schaden daraws, und wa^er daz si uns den dienst versa^ezzen viertzehen tag, so schu^ellen si uns ze wandel geben sechtzich phenning; versa^ezzen si dann aber viertzehen tag, so sind si uns aber ze wandel vervallen sechtzich phenning. Versa^ezzen si dann drey viertzehen tag daz si uns dienst und wandel nich ga^eben, so habent sich allew irew recht vervallen an dem vorgenanten gu^et und ist wider unser ledigs gu^ot als vor. Daz in daz allez stet und unverchert beleib daruber ze einem waren urchu^end geb wir in ich vorgenanter Haintzel der Zeller und ich Christel der Zeller den offen prief versigelten mit unsers lyeben o^ehaims Hainreichs dez Stainpechen anhangundem insigel ze den zeyten richter ze Scha^erding, und under unsers lyeben o^ehaims Lyenhartz dez Ekker anhangundem insigel ze den zeiten phleger ze Dra^etenekk, di irew insigel durch unserr vleizzigen pet willen an den prief habent gelegt in und iren erben an schaden, wand wir selber aygner insigel nicht heten. Darunder wir uns paid Zeller under di vorgenanten insigel verpinden mit unsern trewn allez daz sta^et ze h(alten), daz vor verschriben stet. Der prief ist geben do man zalt von Christi gepu^ert tawsent jar drew hundert jar darnach in dem zwai und sechtzigsten jar an dem heyligen ebenweichtag.

Source Fulltext: OÖUB 8 (Wien 1883), S. 54f., Nr. 52