Wir graf Hainrich von Schawemberch verjehen und tu^en chunt offenlich mit disem brief, daz uns die durchla^euchtigen fursten unser gna^edig lieb herren herczog Ru^odolf herczog Friderich herczog Albrecht und herczog Leupolt ze O^esterreich ze Steyr und ze Kernden ze haymstewr czu^e der edeln grefinn Urseln von Go^ertz unserer lieben wirtinn geben und beschaiden habent auf di behausung ze Scha^erding zway tausend phunt wienner phenning (hier ist wol eine Zeile ausgefallen), der summ wirt funf tausent phunt, darczu^e haben wir ir ze morgengabe geben sechs hundert phunt wienner phenning, desselben geltes allez hat si der edel graf Ulrich von Schawemberch unser lieber pru^oder und wir mit willen und gunst der obgenanten unser herren der herczogen die uber unser nachgeschriben herscheft vest leut und gu^eter unser recht lehenherren sind geweiht auf unsere gemaine lehen die herschaft vest und den markt ze Ort mit le/uten geriehten gu^etern und allen andern nu^etzen und rechten die darzu^e geho^erent also, daz dieselb unser wirtinn gra^efinn Ursel und ir erben darauf haben su^ellen die egenanten fu^enf tausent phunt wienner phenning, zway tausent phunt ze haimstewer und drew tausent phunt ze widerleg als haimstewr und widerlegung recht ist. Aber die sechs hundert phunt wienner phenning sol die obgenant unser wirtinn darauf haben als morgengab und landes recht ist ze O^esterreich mit der beschaidenhait, daz die egenant unser wirtinn gra^efinn Ursel und ir erben daselbs ze Ort jerlich als vil nutz und gu^elt innemmen als gen den egenanten fu^enf tausent und sechs hundert phunden gebu^eret, daz ist cze merken je von czehen phunden ain phunt geltes an allez geva^er, und ob wir und si mit einander leiberben su^ene oder to^echter gewinnen, darauf su^ellen wenn wir abgen die egenanten fu^enf tausent phunt gevallen, aber wenn wir oder die egenanten unser wirtinn an leibeserben die wir mit ainander hieten abgen, so sullen die vorgenanten fu^enf tausent phunt gevallen auf uns oder auf die egenanten unser wirtinn welichs denn under uns daz ander u^eberlebt. Wenn aber dieselb person ouch abget, so sullen czway tausent phunt desselben gu^etes erben und gevallen auf die obgenanten unser herren von O^esterreich und ir erben und die drew tausend phunt sullen gevallen auf unser na^echsten erben als pillich und recht ist. dann mit den sechs hundert phunden die wir der egenanten unser wirtinn ze morgengab geben haben als da vor geschriben stat, mag si wol getu^en und schaffen waz si wil, und des ze urchunde geben wir vorgenanter graf Hainreich von Schawemberch diesen brief versigelten mit unserm und des obgenanten unsers bru^eders graf Ulrichs insigeln. Und wir graf Ulrich von Schawemberch bechennen und tu^en chunt, daz die obgeschriben weisung und tayding mit unserm willen und wizzen geschehen sind und daz wir daruber unser insigel an disen brief gehenket haben; der geben ist ze Wienn an eritag nach dem heiligen prehentag nach Christes gepu^ert drewtzehen hundert jar darnach in dem zway und sechtzigisten jare.

Source Fulltext: OÖUB 8 (Wien 1883), S. 56f., Nr. 55