Ich Albrecht der Praitenekker vergich, daz mir mein lieber oheim her Pylgreim von Rotaw den hof ze Mittichen und seinen tail an dem zehent vor dem vorst der von dem hochgeborn fu^ersten meinem genedigen lieben herren herczog Rudolffen ze O^esterreich ze Steyr und ze Ka^ernden ze lehen ist, nach seinem tode gemacht und aufgeben hat mit desselben lehenherren hant, und hat derselb mein herre den egenanten hof und den zehent mir und meinen erben ze rechtem lehen in gemechtsweise von seinen genaden verlihen. So han ich im verhaizzen fur mich und mein erben damit ze wartten und gehorsam ze sein, als ein man seinem rechten lehenherren pillich tu^en sol. Und des ze urkund gib ich disen brief besigelten mit der edeln und erbern herren insigeln herrn Jansen von Trawn houbtman ob der Ens und herrn Otten von Zelking, darunder ich mich verpint alles das genczlichen stet ze haben das vorgeschriben stet wand ich nicht aygens insigels han. Der brief ist geben ze Pazzaw an phincztag nach sant Jacobs tage nach kristes geburt drewczehenhundert jar und darnach in dem zwai und sechczigistem jare.

Source Fulltext: OÖUB 8 (Wien 1883), S. 94, Nr. 92