ICH Herman der Geytzesteta^er und ich Elspet sein hawsfraw und mitsampt uns all unser erben paide sun und to^echter verjehen, daz wier versatzt haben dem gotzhaws datz sand Gallnewnchirichen unser ansidel den hof datz dem Altenperg in derselben pharr gelegen der unser rechtes lehen gewesen ist von dem erbern herren herren Ruegern von Starhenberch, mit desselben herren hant haben wier dem egenanten gotzhaws den obgenanten hof und satze gemacht und besta^ett mit allen den eren rechten und nutzen, und dartzu^e geho^ert umb tzwaihundert phunt phenning alter wienner munzz der wier von dem egenanten gotzhaws gantz und gar gericht und gewert sein, da der vorgenant her Rueger von Starhenberch durich Got von seinem mugen die lehenschaft zue aufgeben hat ze unserer vrawn messe. Und wa^er daz daz yemand hervuer cha^em der pesser erb dartzue wold sein, der schol dem obgenanten gotzhawz geben tzwaihundert phunt pfening alter wienner munzz an allen chrieg. Daz dem oftgenanten gotzhaws dem pharrer und den pharrlewten die red und die wandlung alz vorgeschriben ist von uns und von allen unsern erben also sta^et und unverchert peleib, daruber so gib ich in obgenanter Herman der Geylzesteta^er den offen prieff besigelt mit meinem anhangunden ingsigel. Der red sind getzewg von erst der erber herr herr Rueger von Starhenberch der erber ritter herr Andre von Hawnsperg ze den tzeiten purgraf ze Riedekk der erber man Walchuen der Tzeller und Fridreich der Volchrat von dem Pach all mit ieren anhangunden ingsigeln. Der prief ist gegeben nach Christi gepuerd da vergangen waren drewtzehenhundert jar darnach in dem vier und sechtzigisten jar an aller mann vaschsangtag dez suntags Invocavit an dem ersten suntag in der vasten.

Source Fulltext: OÖUB 8 (Wien 1883), S. 166f., Nr. 162