ICH Ulreich der Drukchsa^ecze Meinhartz des Drukchsa^eczen sun von O^ed sa^elig verjeh, daz mir mein mueter O^essann pei ir lemptigen leib mit meiner geswistered guetleichem willen und wo^ert Gotschalchs und Elspechten den sacz auf dem obern guet ze O^ed daz ir sacz von den Zellern her ist fu^er sechs und vierczikch phunt phenning, und ein hoff gelegen in dem Atergaw, der genant ist der Mayerhoff, und ein mül daselben und waz ze den vorgenanten stukchen gehort gegeben hat. Auf den selben vor genanten stukchen han ich meiner lieben hausvrawen vrown Katrein Wernharcz dez Hayczinger tochter geben ze rechtem heyratgut hundert phunt wienner phenning, und auz den selben hundert phunden gib ich ir fu^emfcziczkch (sic) phunt der vorgenanten muncze fu^er ir morgengab, daz si die selben vorgenanten stukch dafu^er inn haben sol fur ir heyratgut und fur ir morgengab und sol irn frum damit schaffen, als ein vrawe mit ir morgengab durchs recht tun sol, als landes recht ist ob der Enns. Wer aber daz wir nicht leibeserben mit ein ander gewu^ennen, so sol mein vorgenante haussvrawe ver Katrei nach meim to^ed die fumfczikch phunt ze rechtem heiratgüt unverchumbert inn haben uncz an iern tod, und nach irem tod su^ellen dann di vor verschriben fu^emfczizch phunt phenning der ob geschriben mu^enzze heirat gu^etz her wider auf mich vor genanten Ulreich den Drukchsa^eczen und an all mein nachst erben und nachchomen erben und gevallen. Daz ir daz allez sta^et und unverchert beleib daruber ze einem warn vestem und sta^etem urchunde geben wir den offenn brief versigelten ich ob genanter Ulreich der Dru^ekchsa^etze und ich Gotschalich der Drukchsa^etze mit unser peder anhangenden insigeln, und ze einer pezzern sycherhait mit der erbern und beschaiden unser lieben frewnt Lorenczen dez Vetzinger Stephanns des Liechtenwinkchler ir peder insigel. Der brief ist geben nach Christi gepu^erd uber drewzehen hundert jar darnach in dem vir und sechczikchisten jar an sand Ulreichs tag.

Source Fulltext: OÖUB 8 (Wien 1883), S. 181f., Nr. 177