ICH Ulreich der Swarcz purger dacz dem Newnmarcht und mein hausvraw^e Margret Stephans dez Pu^ellers tochter und all unser paider erben verjehen, daz wir getailt sein von aller der hab die mein sweher Stephan der Pu^eller lazzen hat, von erst genant der Pu^ellhof der lehen ist von dem wirdigen herren abpt von Gersten, und der ander hof genant ze Wizzenpach auf dem Jurnitzperg der lehen ist von dem edeln fu^orsten von O^esterreich und die paid gelegen sint in Newnmarchter pfarr, und dornach von aller der hab die der vorge¬nant Stephan der Pu^eller lazzen hat, also beschaidenlich, daz wir dorumb von in enphangen haben an ains fu^emfczich pfunt alter wienner pfenning, der wir gantz und gar gericht und gewert sein also mit auzgenomener red, daz ich egenanter Ulreich der Swartz und mein hausvraw^e Margret mit sampt unsern erben chain ansprach noch vorderung fu^erbaz niemer mer gehaben schu^ellen weder mit recht noch a^en recht hincz den vorgenanten hoffen und zw der andern hab alz vor geschriben ist. Daz die red also stet und untzerprochen beleib, doruber so gib ich vorgenanter Ulreich der Swartz und mein hausvraw^e Margret und all unser paider erben in den offen brief wol versigelt und bestet fu^er allen chunftigen chrieg mit dez erberigen mans Leu^etoltz des Stainrawters zder zeit prukgraff (sic) zder Vreinstat anhangunden insigel, und mit dez erberigen mans Chu^enrat dez Heller von dem Newnmarcht anhangu^enden insigel, dorunder wir unz verpinten mit unsern trewen allez daz stet zebehalten daz an dem brif geschriben stet wand wir zder zeit aygens insigels nicht heten. Der brief ist geben do man zalt nach Christez gepurtt drewtzehen hundert jar und dornach in dem vier und sechtzigistem jar dez na^echsten fritags (sic) vor dem heiligen phingsttag.

Source Fulltext: OÖUB 8 (Wien 1883), S. 178f., Nr. 173