Wir Albrecht von Gotes genaden herczog ze Ossterreich ze Steyr ze Kernden graff ze Tyrol etc. erbieten unssern getrewn allen richttern und mawttern und allen andern unssern amptlawten und undertanen den diser brieff gezaigt wiert unsser gnad und alles gut, wir gepieten ew gar ernstleich und wellen und maynen auch, daz ir unser puriger von Enns weder si selb noch ir hab nicht verpietet noch hefftet weder auf wasser noch auf land. Hat yemant aber icht ze sprechen der tu daz an den rechten mawtsteten ze Lynncz ze Ybs oder ze Stain da man daz recht erchennen oder erfinden sol als daz von altter herchomen ist. Geben ze Wienn am mitichen vor dem suntag als man singet Letare ze mittervasten anno domini M ccc Ix Nono (millesimo trecentesimo sexagesimo nono).

Source Fulltext: OÖUB 8 (Wien 1883), S. 410, Nr. 414