Ich Hanns der Trawner von der Freynstat ze den zeiten pfleger ze Tittmaning ich Heinreich von Neytperg ze den zeiten hauptman ze Salczburg ich Dyetmar von Losenstain ze den zeiten purchgraf ze Halbenberg ich Ulreich Nusstorffer purchgraf ze Haunsperg und ich Ha^ertel der Losenstainer ze den zeiten purch graf ze Tetelhaim wir verjehen offenlich mit dem brief und tu^en chunt, das wir von der chrieg zu^espru^ech scha^eden vordrung und sto^ezz wegen die zwischen unsers gnaedigen herren hern Pilgreinns ertzbischof ze Salczburg legaten des stuls ze Rom an ainem tail, und Karlen des Trawner an dem andern tail uncz auf heutigen tag sich ergangen habent der sev paidenthalb willichlich und ga^enczlich hinder uns gegangen sint nach der brief sag die wir von in daru^eber haben, mit dem rechten erfunden und erchennt haben und sprechen auch nach dem rechten des ersten, daz Karl der Trawner von der vorgenanten zu^espru^ech chrieg scha^eden vordrung und sto^ezz wegen hincz unserm obgenanten herren von Salczburg hincz seinem gotshaus und nahcho^emen noch hincz den iren dhain ansprach haben sol noch mag in dhainen weg, es sol auch Karl der Trawner unserm egenanten herren von Salzburg und seinem gotshaus zway gantzev jar die schirst nach einander cho^emen dienstlich wartund sein so er pest mag, und getrewleich dienn wenn in unser egenanter herr von Salzburg oder sein hauptman vordert, und sol in unser her von Salzburg sein gotshaus und nachchomen noch die iren von desselben dienst wegen nichtz gepunden sein ze geben weder fu^er scha^eden noch umb dinst, so sol er auch hincz in dhain vordrung noch ansprach darumb haben in dhainen weg. darzu^e sol auch der egenant Karl der Trawner in denselben zwayn jaren wider unsern oftgenanten herren von Salzburg wider sein gotshaus und nachchomen nicht tu^en noch nieman wider sev ze dinst werden. aber umb die ansprach die Karl der Trawner hat hincz etleichen hawsern cze Wa^eging gelegen, so sol im unser vorgenanter her von Salzburg recht schaffen oder tu^en wenn er es vordert als pilleich ist nach landes recht. und daru^eber ze urchund geben wir die vorgenanten herren, her Hanns der Trawner Heinreich von Neytperg Dyetmar von Losenstain Ulreich Nusstorffer und Ha^ertel Losenstainer disen brief versigelt mit unsern anhangunden insigeln, der geschriben ist ze Salczburg an mitichen vor dem heiligen pfingsttag nach Christi gepurd drewczehenhundert jar darnach in dem newn und sechczigistem jar.

Source Fulltext: OÖUB 8 (Wien 1883), S. 416f., Nr. 421