Ich Andre der Gru^eber vergich offenlich mit disem brief fu^er mich und fu^er mein erben, wan mir der hochgeborn fu^erst mein genediger herr herczog Albrecht von O^esterreich etc. gunnet und erloubet hat das purchstal genant der Stayn bei Liebenstain aufczevahen und darauf ain veste ze pawen, hab ich im dem hochgebornen fu^ersten herczog Leupolten von O^esterreich etc. seinem bruder ouch meinem genedigen herren und irn erben verhaizzen und gelobt fu^er mich und fu^er mein erben verhaizze und gelob ouch mit disem briefe, daz wir in mit der egenanten vesten warten und gehorsam sein sullen und wellen zu allen iren no^eten, und in die offen haben an unsern merklichen schaden und ouch in noch irn lantleuten darauz chainen schaden tu^en noch des yeman ander gestatten ze tu^en an alles geverde. Und des ze u^erchund gib ich der vorgenant Andre der Gru^eber fu^er mich und die vorgenanten mein erben disen brief besigelten mit meinem anhangunden insigel. Der geben ist ze Lyncz an freitag nach sand Michels tag nach Kristes gepurd dreuczehenhundert jar darnach in dem neun und sechczigistem jare.

Source Fulltext: OÖUB 8 (Wien 1883), S. 436, Nr. 442