Dem erwurdigen hern Pauln bischofen ze Freysingen unserm lieben freunt oder wer an sein stat ist ze Waidhofen, embieten wir Albrecht von Gotes gnaden hertzog ze O^esterreich ze Steyr ze Kernden und ze Krain graf ze Tyrol etc. unsern freuntlichen grus und alles gu^ot. Die purger derselben ewr stat ze Waidthofen habent von unsern vordern und auch uns solich gnad daz si auz unserm Eysenerzt in dieselb ewer stat eysen gefuren mugen was si des darinn bedurffen und verarbaitten und nicht mer. Nu habent uns unser purger von Steyr fu^erbracht mit klag, daz si des mer furen denn si sullen und senden ez auz bei tag und bei nacht da es an unser mautstett weder gen Steyr noch gen Ens chomt, das dunket uns nicht pillich, da bitten wir ewr freuntschaft mit gantzem ernste daz ir das understet und auch schaffet mit den egenanten ewrn purgern daz si nicht mer eysens furen denn als vil si des in der egenannden stat ze Waidhofen bedurffen. Teten si aber des nicht des wir doch nicht getrawen, so wollten wir in die egenannte recht umb das vorgenannte eysen ganz und gar wider abnemen und furbaz nicht mer fu^eren lazzen, und wa si auch furbas damitte begriffen wurden und solich eysen furten, da wolten wir in daz haizzen nemen und si gar swerlich darumb pezzern. Geben ze Wienn am eritag vor sand Jorgen tag McccLxxi (millesimo trecentesimo septuagesimo primo).

Source Fulltext: OÖUB 8 (Wien 1883), S. 522f., Nr. 527