WIR Albrecht und Leupolt brueder von Gottes genaden hertzogen zu Osterreich ze Steyr ze Kärndten unnd ze Crain graven zu Tyrol etc. bekennen unnd thuen kundt offentlich mit disem brieff, das wir angesehen haben die gebresten die unnser stat ze Welss manigfeltigclich anligent sindt, unnd haben den burgern gemainigclich daselbs zu Welss die gnad gethan und thuen auch, swass man holtzes oberhalben Welss auf der Traun oder auf andern wassern wie die genannt sindt abwertz unnd enawfüert, das dasselb holtz nicht verrer solt gefüert werden dann geen Welss unnd nicht fürbass, und das egenannt holtz mügen unnd sollen die vorgenannten unser burger von Welss danne kauffen unnd ander niemandt und damit fürbass wandlen wie sie wellen unnd als in des aller beste kome unnd fuege an alle yrrung als lang, untz wir bede oder unnser ainer das widerrueffen. Mit urkundt diss brieffs geben ze Wienn am mittichen nach sanct Georgen tag anno domini millesimo trecentesimo septuagesimo secundo.

Source Fulltext: OÖUB 8 (Wien 1883), S. 589, Nr. 587