Wir Albrecht von Gotes gnaden hertzog ze Osterreich ze Steyr ze Kernden und ze Krain graf ze Tyrol etc. embieten unserm getrewn dem richter dem rate und den burgern ze Waydhoven unser gnad und alles gu^ot. Umb die genad die wir ew vormals haben getan, daz ir umb soliche koufmanschaft der ir in der stat daselbs bedurffet und die ir auch in der stat und nicht anderswa vertu^ot mo^echtet und soltet arbaitten gen Venedi, ist uns fu^orbracht daz ir mit derselben koufmanschaft auz der stat arbaittet anders denn wir ew haben erlaubet des unser stette dabey grozzen schaden nemen, davon emphelhen wir ew und mainen ernstlich, das ir des fu^erbaz nicht tu^ot und unser gnad niezzet in der mazze als wir ew die haben geben nach sag ewr brief und nicht daru^eber greiffet in khainen weg; wann wo ir das nicht tetet so wurde ew ewr koufmanschaft aufgehebt und genomen. Geben ze Wienn am mitichen vor weihnachten anno McccLxxii (millesimo trecentesimo septuagesimo secundo).

Source Fulltext: OÖUB 8 (Wien 1883), S. 627f., Nr. 627