Wir Ulrich von Rossenberg und all unnser erben verjechen, das wier unserm sun Hainrichn von Rossenberg geben haben zw ainem rechten channen unsers liebn swecher graffe Hainrich von Schawnnberg tochter di genant ist Barbara, und gebem im auch zu ir zw rechtem heirattgutt drew tawsent guldein, dafu^er wir in setzen unser statt zw Sobisla und was darzw geho^ertt, aus derselben gult sy alle jar haben sol drew hundertt phunt geltz. Wa^er aber das sy daran icht abgangk hett so sullen wir in (sic) es erstatten auf ander unser hab wo wir di haben, untzt ir di vorgenanten drewhundertt phunt geltz volligclich gevallen. Wir sullen auch unsern vorgenanten sun Hainreichenn zw unsers vorgenanten swecher tochter di genant ist Barbara zw legen in sechs jaren darnach und der brief geben ist, und als pald di zulegung geschichtt ging dann unser vorgenantter sun mit dem tod ab da Gott vor sey, so peleibn di egenanten drew tausent guldein der vorgenanten seiner hawsfrawn, di mag sy wol schaffen und geben wem sy will an irrung, und sullen wir und unser erben antwurtten unverzogenlich auch nymermer darnach sprechen weder mit recht noch an recht. Wir verjechen auch, ob unser vorgenanter sun Hainrich von Rossenberg Barbara nicht nam und ob wir in zw der egenanten Barbara nicht legten in den sechs jaren als vorgemelt ist, so sey wir des vorgenanten heiratguts der dreier tausent guldein vervallenn, sy sullen wir und unser erben antwurtten unverzogenlich unserm liebn swecher graf Hainrichen von Schawnberg seinen erben gen dem Newnhaws oder gen Schawnberg in der zwaier vest aine. Wir sein auch der obgenanten statt zw Sobisla mit aller irer zugehorung aus derselben gult sy haben sol drew hundertt phunt geltz ir rechter gewer und schermen fur all ansprach nach des recht zw Pehaim. Umb di obgeschriben sach alle setzen wir zusambt unns zw selb schollen und ze parigen unser lieb brueder herrn Petter von Rossenberg und unsern liebn ohaim herrn Hainrichen von Newnhaws also mit der beschaidenn, ob sich indertt verzuge das vorn an dem brief geschriben stett von welherlay sach das bescha^ech, so haben sy vollen gewallt unser yglichen zu nemen (sic) und ze hannt nach der maynung, so sullen wir in an alle widerred unser yglicher senden und inlegen ain erbern knecht mit zwain pharden in di statt gen Everding oder gen Pewrbach an der zwaier stett aine wo sy den hin zaigenn, und sullen da inelegen und laisten als inelegns und laistenns recht ist, und nicht davon ausgen untzt wir in alles das volfu^eren das vor an dem brief geschriben stett. War aber das in di laistung indertt verzogenn wurde, wie sich das fugte was sy des schaden namen den ir ains pey seinen trewen gesprechen mag an ayd unberecht und unbesworen, denselben schaden zw sambt dem haubt gutt lohn wir in gantz und gar abzulegen und widerkeren an allen irn schaden, und sullen sy das haben auf uns unsern eriben und trewen und darzw auf aller der hab di wir haben wy di genant ist oder wo di gelegen ist, davon sy sich selb richten und wern sullen mit unserm gutlichem willen und sullen wir das mit nichte widersprechen. Wir haben auch volligen gewallt alle jar jarlich unsern statt Sobisla zw losen auf welhen tag und zw welher tzeitt uns des verlust in dem jar, und sullen uns der losung statt tu^en an all irrung. Wir sullen in auch das vorgenannt gelt da wir unser statt umb losen antwurtten in di vest gen dem Newnnhaws oder gen Schawnberg angevar. Mitt urkund des briefs den wir in dar u^eber geben versigelt mit unserm anhangunden insigl und mit unser selbscholen und parigen unser lieben brueder herrn Petern und herrn Jan gebrueder von Rossenberg anhangunden insigl und mit unsers liebn ohaims herrn Hainrichs von Newnhaws anhangunden insigl, der geben ist do man zallt nach Kristi gepu^erd dreizechenhundertt jar und in dem vir und sibentzigistem jar des phintztags nach dem heiling osterr tag.

Source Fulltext: OÖUB 8 (Wien 1883), S. 691ff., Nr. 683