ICH Eberhart von Chappell der jung und alle mein erben vergehen und tu^en chunt offenleich mit dem brief umb die sechshundert phunt wienner phenning die wir gelten sullen Daviden dem juden dem Stewzzen ze Wienne Hennlein sun von Newnbu^erch und seinen erben, und darumb unser ohem her Rudolf von Waltse und Jorig von Chranichperch von Murekk Andre der Perchhaymer Hertneyd der Schikch und alle ir erben durich irer trewen und unserr vleizzigen pet willen selbgescholn und gewern mit uns worden sint, als der brief sagt den die vorgenauten juden von uns unverschaidenleich darumb habent, das ich egenanter Eberhart von Chappell und alle mein erben den vorgenanten hern Rudolfen von Waltse Jorigen von Chranichperch und iren erben gelobt und verhaizzen haben und verhaizzeh ouch mit dem brief, daz wir si von der vorgenanten geltschuld gentzleich ledigen und lo^esen su^elln an allen iren schaden von sand Pangretzen tag der schierist chu^emt u^eber ein jar; tu^on wir des nicht swaz si des denne fu^erbas schaden nement datz christen und datz juden, wie der schad genant ist das ier ainer bey seinen trewn ungeswarn gesprechen mag, denselben schaden sullen wir in gentzleich ablegen und widerchern wenne si des nicht lenger enpern wellent. Tet wir des ouch nicht wenne si uns denne monent und vodernt, so sullen wir zwen erber chnecht igleichen selbandern mit zwain pherten des nechsten tags darnach ze Wienn in ein erber gasthaws senden wo si uns hin zaigent, und su^elln die do inneligen und laisten alz inneligens und laistens recht ist, und do nicht auschemen untz das wir die vor genanten hern Rudolfen von Waltse Jörigen von Chranichperch und ir erben von der egenanten geltschuld umb houptgut und umb schaden gentzleich geledigen und gelösen, und daz wir in ouch allen den schaden ablegen und widerchern den si des nement als vorgeschriben stet, das luben wir in alles ze laisten mit unsern trewn und sullen ouch si das haben ouf uns und ouf allem unserm gut das wir haben in dem lannde ze O^esterreich ob der Ens und linder der Ens oder wo wir es haben, davon in unser her der hertzog in O^esterreich oder wer seinen gewalt hat an alles fürbot und an alle chlag phant antwurten solwo si darouf zaigent, wenne si des nach der obgenanten vrist nicht lenger enpern wellent alsverr, das si sich selber von der egenanten geltschuld umb houptgut und umb schaden gentzleich geledigen und gelo^esen und das si ouch alles des schadens verrichtet und gewert werden den si des nement als vorgeschriben stet, wir sein lebentig oder tod. Und daru^eber so gib ich obgenanter Eberhart von Chappell für mich und fu^er alle mein erben in den brief zu einem warn urchund der sach mit meinem insigil und mit der erbern herren insigiln hern Haydenreich von Meissaw obrister schenkch in O^esterreich und hern Hannsen von Liechtenstain zu den zeiten meins gnedigen herren hertzog Albrechts hofmaister. Der brief ist geben ze Wienn nach Christes gepu^ert drewtzehenhundert jar darnach in dem fumf und sybentzgisten jare an des heyligen chrewtzs tag als es funden ist.

Source Fulltext: OÖUB 8 (Wien 1883), S. 754f., Nr. 732