Wir Johanns der Jung lantgraf zw dem Leutenberg vnd graf zw Hals vnd vnser Hausfraw Kunigund des Edlen wolgeborn vnsers lieben Swechers Graf hainrichs von Schawnberg Tochter vnd all vnser Erben vnd nachkomen Bekennen vnd tu^en kund offennlich mit dem brief allen den dj in sehent, horent oder lesent, das vnns vnser egenanter lieber Swecher vnd vatter zw heiratgutt gegeben hatt zway tausent phunt wienner phenning zw der vorgenanten seiner tochter vnser wirttin vnd der Er vns gar vnd gantzlich an allen schaden bericht vnd bezallt hatt, Darumb wir vns alles des Eribtails verzigen Haben vnd verzeichen auch vns des gantzlich mit dem brief, den wir bey vnserm obgenanten lieben Swecher vnd vatter mitsambt andern vnsern geswistraidten gehabt haben, wie das alles genant oder gehaissenn ist, besucht vnd vnbesuchtt Also, das wir noch vnser Erben vnd nachkomen kain ansprach noch vordrung darnach nymermer gehaben noch gewingen sullen noch wellen mit recht oder anrechtt, wir noch ander yemant von vnsern wegen jn kainerlay weis Mitt der beschaiden: Ob das wa^er, das vnser vorgenanter lieber swecher vnd vatter an leiblich Erben, das Su^en waren, von todes wegen abgienge, da gott vor sey, oder wie das geschach, das dj Herschafft, dj vnser obgenanter lieber Swecher vnd vatter hinder Jm liess, Eriblos wurde, Da kain rechter Erib mer war, das Su^en sind, dj von Jm oder seinen Su^enen komen waren, So schullen wir geleichen Eribtail haben vnd Eriben mit andern vnsern Swestern angeuar . Vnd dar vber zw ainem statten vnd waren Vrkundt geben wir vnserm egenanten lieben swecher vnd vatter vnd allen seinen Erben den brief versigelt mit vnserm obgenantten landgraf vnd vnser lieben wirttin frawn Kunigunden anhangunden Jnsigl, Der Geben ist zw Schawnberg Nach Kristi gepurdt drewzechenhundertt Jar Darnach in dem Sechs vnd Sibentzigistenn Jarenn.

Source Fulltext: OÖUB 9 (Wien 1906), S. 181-182