Ich Diettreich von Ru^eczestorf vnd ich Chu^enrat Haetschel die czwen ge pru^eder vnd alle vnser Erben, wir vergehn vnd tu^en chunt allen den die den bri^ef Lesent oder Ho^erent Lesen, die nu Lebent vnd her noch chu^enftig sint daz wir mit gu^etem Willen mit verdachtem mu^et zu^e der czeit do wir ez wol getu^en mochten Recht vnd redeleich verchauft vnd geben haben den Erbern Lewten der ganczen gemain ze Ru^eczestorf vnd allen i^ern Nach chomen funf Jeuch akcherers (!) gelegen daselbens ze Ru^eczestorf vnd haizzet an dem Grazzweg die vnser Lehen sint gewesen von der Erbern Herrn Hern Vireichen von Pergaw vnd seinen pru^edern vnd die geho^ert habent in vnsern Hof gelegen daselbens ze Ru^eczestorf den wir von den selben Herren ze lehen haben daraws si vns die genanten funf Jeuch akchers Ledichleich ze verchauffen erlaubt habent vmb fünfthalb phunt Wi^enner phennig der vns die gemain dez vorgenantten dorfs ze Ru^eczestorf gancz vnd gar gewert hat, also daz Si vnd alle ir Nach chomen die eggenanten fünf Jeuch akchers fürbaz ebichleich zu einer viechtrifft niezzen vnd nu^eczzen su^ellen vnd auch allen iren frumen da mit schaffen su^ellen, wie in daz aller pest chomt vnd fuegleich ist ledichchleich vnd vreileich an alle i^erung vnd sein auch wi^er vnd alle vnser erben vnuerschaidenleich der selben fünf Jeuch akchers i^er recht gewern vnd scherm fu^er alle ansprach nach dez Lanndes recht ze O^esterreich. Wer aber daz si an den selben fünf Jeuchen icht chrieges oder ansprach gewunnen, von wem daz wer mit recht, Swas si dez schaden nement, daz su^ellen wi^er Jn allez ausrichten vnd widerchern an allen irn schaden vnd su^ellen si daz haben auf vns vnuerschaidenleich vnd auf allem vnserem Gu^et, daz wir haben in dem Lande ze O^esterreich oder wo wi^er ez haben, wi^er sein Lebentig oder To^et. Vnd daz der chauf fu^erbaz ste^et vnd vnczeprochen beleih dar vber so geben wi^er in den bri^ef zu^e einem waren vrkund der sach versigelt mit vnsern Jnsigel vnd dez ist geczeug der Erber Herr Her Vlrereich (!) von Pergaw mit seinem Jnsigel. Der pri^ef ist geben nach Christes gepu^ert drewczehen hundert iar dar nach in sechs vnd sybenczgisten iar an dem Heyligen Kcharvreittag.

Source Fulltext: OÖUB 9 (Wien 1906), S. 64-65