Ich Vlreich der Leytner mein Hausfräw vnd all vnser Eriben veriehen offenleich an dem prief allen Läwten, dy in sehent, lesent oder hörent lesen, daz vns dy Erwirdigen vnser genädigen Herren gemainchleich dy Chorherren dez Capitels zü Pazzaw von pesundern genaden verlissen vnd lazzen habend irn zehent mit aller zügehörung ze Münschirchen, alz sy sein sitzend in nütz vnd in gewer, für aygen vnd alz in der Tayschircher vnd ander Läwt vor von in vnd von irn genäden ynn gehabt habend, Mit der peschaiden, daz wir all jär järleich da von dienen vnd geben schullen vnsern obgenanten genädigen Herren an allen irn schaden vnd an allen abganch, wie ez in dem Lant stet oder ist, irm Chellner, wer der ist gein Pazzaw auf irn chasten ain schaff gütz chörns vnd ain schaff haberns irr Rechten chasten mazz, ze Rechter dinst zeit, alz ander ir Holden vnd Hindersäzzen. Täten wir dez nicht, von welicher sachen daz wär daz wir ez Verzügen vnd nicht gäben, auf dy selben dinst zeit all jar auf sand Michels tag, so sein wir zehant, wie ez get, von allen vnsem Rechten, daz wir fur baz dar auf nichtz mer ze sprechen noch ze vodern haben, hintz dem obgenanten zehent, noch waz davon pechömen mag noch hintz vnsem obgenanten herren noch hintz den andern im läwten noch güten vmb chainerlay sach, wy dy genant ist, an alz gevär. Wir schullen auch von dem obgenanten zehent nichcz verchauffen noch versetzen weder wenich noch vil chainen Läwten, ez sein grünt oder pödem, dann mit vnserr obgenanten Herren gütem willen vnd mit irn priefen. Täten wir daz dar vber, daz hat chain chraft vnd ist auch nichtz daran, wie wir daz vberfürn vnd dar zü sein wir aber von vnsern Rechten, vnd so mügen sich dann vnserr obgenanten Herren oder ir Chellner, wer der ist oder ander ir Amptläwt dezselben zehentz wol vnder winden vnd lazzen, wem sy wellen, an alz Recht vnd all vnsere widerred, vnd da schullen noch mügen wir sew noch dy im, wer dy sind, nicht an engen noch irren weder mit Recht noch an Recht noch mit chainerlay sach noch niemant von vnsern wegen an alz geuär vnd waz wir versäzzen oder versezzen hieten, dar zü dinst alz oben perürt ist vnd genant oder schaden, den schullen wir in dannoch widerchern vnd geben an allez verziechen, zehant dar in den nachsten viertzehen tagen, dy dar nach chömend . Täten wir dez auch nicht, so habend aber vnserr obgenant genadigen Herren oder ir Chellner oder ir diener oder Amptläwt vollen gewalt vns dar vmb zu phenten auf aller vnsrer Hab, wo wir dy haben an alz Recht vmb schaden vnd vmb Hauptgüt vnd daz sullen wir aus Richten gein allen gerichten vnd Amptläwten an allen ir schaden vnd dar vber zü einem vrchünd vnd stätichait gib ich vorgenant vlreich der leytner mein hausfraw vnd vnser erben den Erwirdigen vorgenanten vnsern genädigen Herren den Chorherren dez Capitels zü Pazzaw den prief versigilten mit der Erbern peschaiden Erasems dez Aychperiger dy zeit phleger ze viechtenstain vnd Lewpoltz dez Tumayr dy zeit pröbst enhalb prükk anhangunden Jnsigel dy sy dar an gehangen haben durch vnserr vleizzigen pet in vnd irn erben an schaden dar vnder wir vns verpinten mit vnsern trewn allez daz stat ze haben daz oben an dem prief perürt ist. Geben nach Christi gepürd drewzehen Hundert jar vnd dar nach in dem Sechs vnd Sibentzkistem jar an sand Görigen tag.

Source Fulltext: OÖUB 9 (Wien 1906), S. 69-71