Wir Graf Hainrich von Schawnberch . bechennen fu^er vns vnd alle vnser Erben vnd nachkomen offenleich mit dem brief allen den di in sehent. ho^erent oder lesent. daz wir du^erch besunder liebe . die wir haben . zw dem erbern Abptt Nicla zw Alderspach .. demselben goczhaus . die genad haben getan, doch zw voderist dürch got, daz man in ain pfunt Salcz, dez weiten pandes . zw einem mal in dem Jar fu^eren sol . dacz Aschach fu^er vngemautt ewichleich. Auch sullen si herauf wider wazzers fu^ern . vngemautt. Swas in wirt, weins, in iren weingärten vnd Swas in getraidez wirt auf iren Äkchern, vnd sol daz ir bot bewa^ern, daz daz vorgenant gu^et in worden sey, auf irn Äkchern vnd in iren weingärten. Swas si vazz bedürffen, now oder Alt. die sullen auch vngemautt fu^er gen. Si sullen auch vngemautt füren, gezimber, da si mit bezzern, ir Höf, ob si verpru^ennen, oder so faul würden, daz si gezimbers bedarften, alz vil, alz ir notdürft dar zw ist. Nu haben wir in vnd allen iren nach kommen die vorgeschriben Freyung dürch got vnd vnser sel Hail willen, für vns vnd alle vnser Erben vnd nachkomen, vernewt vnd bestat ewichleich, vnd schaffen mit allen vnsern Mauttern vnd Amptlau^eten die wir ietzund haben oder fürbaz gewinnen, daz si daz egenant Gotzhaus, bey der vorgeschriben genad vnd freyung an alle i^errung beleiben lazzen. Dez geben wir in zw v^erchu^end disen brief versigelten mit vnsern grozzen anhangundem Jnsigel, der Geben ist zu Schawnberch nach kristi gebürd dreu zehen hundert Jar vnd in dem Sechs vnd Sibentzigisten Jar an dem Sampcztag vor sand Michels tag.

Source Fulltext: OÖUB 9 (Wien 1906), S. 147-148