Wir Ott von Gotes Genaden dez Heiligen Romischen Reichs Erczkamrer ku^erfu^ers vnd wir Stephan, wir ffridrich vnd Johanns gebru^eder dez egenanten herrn Otten Vettern auch von gots genaden all Pfallenczgrafen by Rein vnd herczogen in Beyern etc. Bechennen vnd tu^on chunt offenleich mit dem brief, Daz wir fu^er vns vnd vnser Erben mit dem Hochgeborn fu^ersten vnserm Lieben O^eheim Herczogen Albrechten von O^esterich etc. frevntlich vber ain chomen sein, alz hienach geschriben stet, Dez Ersten, daz von der sto^ezze, mishel vnd ansprach wegen, so der egenant vnser O^eheim von Österreich hincz Graff heinreichen von Schawnberg hat, Wir noch dheiner vnder vns den selben von Schawnberg retten, beschutten noch verantwurtten noch vns vmb in annemen sullen noch wellen in dhaine weiz, Su^ender wu^erde er vns vmb hilff vnd volkche vodern wider den egenanten von Schawnberg, die sullen wir im tu^en vnd schikchen fu^ederlichen vnd vnuerczogenlich. Dem selben vnserm volkche sol der egenant vnser Oheim von Osterreich Chost geben, alz gewendleich ist, vnd fu^er irn schaden sprechen. Vnd ob daz volkch dheinen schaden na^emen, Waz danne darumb der hochgeborn vnser lieber Swager Burkgraue Fridrich von Nu^ernberg vnd die Edeln Hanns von Abensperg, Heinreich von Walese hawpman an der Enns, Görgen Waldekker vnser Vicztum in Beyern vnd Hannz Mawrlein vmb die scha^eden sprechent, Da bey sol ez beleiben. Wir sullen auch weren vnd vndersten vestichlich an geua^erde, daz keiner der vnsern dem egenanten von Schawnberg geraten, geholffen noch dinstlich sey in dheinen weg, wider den egenanten vnsern O^eheim von Österreich. Welhe aber der vnsern Da v^eber dem von Schawnberg hilfliche zu^oriten, die selben vnd ir hab sullen wir an greiffen, daz im sulhe hilfe von den vnsern nicht beschehe in dheinen weg. Mit vrchund dicz briefs, der gegeben ist ze Passaw an Mitichen vor sand Gyligen tag mit vnsern anhangenden Insigeln versigelten Anno domini Millesimo Trecentesimo Lxx. Sexto.

Source Fulltext: OÖUB 9 (Wien 1906), S. 139-140