Jch Hanns der Pirichinger ze Sighärting mein Hausfraw vnd all vnser Eriben veriehen offenleich an dem prief allen Lewten, daz vns dy Erwirdigen vnser genädig Herren dy Chorherren gemainchleich dez Capitels ze Pazzaw von pesundern genäden vnd dinst lazzen vnd verlihen habend mit aller zügehörung versucht vnd vnversücht an alz geuär, alz si ez selb ynn gehabt habend ier güt ze Chajpeln gelegen in Tawfchircher pharr in Schärdinger gericht, Mit der beschaiden, daz wir in oder irm obern chellner all iar järleich, wer der dy weil ist an irr stat geben vnd dienen schullen ze rechter stift zeit wenn er dy tüt oder hat in dem jar ein halbs phünt güter wienner phenning vnd zway stift huen an allen schaden vnd allez vertziehen, wie ez in dem Lande stet. si schullen auch nichtz engelten in chainerlay sach noch verpotz, wie daz chömen möcht an alz geuär an ir obgenanten vodrung vnd dinst. . Täten wir dez nicht, so gent albeg dar nach vber viertzehen tag dar auf ze wandel zwen vnd dreyssich wienner phenning dar vmb mügen vns vnser obgenant Herren vmb phenten oder ir Amptlewt, wer dy sind auf aller vnser hab, wo wir dy haben vngeuarleich vmb Häuptgüt vnd vmb wandel, daz schullen wir in nicht wider sten noch dar ynn irren noch niemant von vnsern wegen. Liezzen wir aber den obgenanten Dinst vnd dy wandel sten iar vnd tag, daz wir sew oder irn chellner nicht Richtäten, so sein wir von allen vnsern Rechten vnd Eribschaft vnd schullen dann fürbaz nymmer mer chain ansprach noch Recht weder Geistleichs noch werltleichs noch chainerlay sach dar nach gehaben noch gewinnen noch niemant von vnsern wegen . vnd mügen sich dann vnser obgenant Herren oder ir Amptlewt dez gütes vnderwinden für freyes aygen an alz Recht vnd allew wider Red vnd mügen dann vnser obgenant Herren irn früm mit dem obgenanten güt schaffen, lazzen vnd geben wem si wellen oder wie si mügen. Wir schullen auch nichtz versetzen noch verchauffen von dem obgenanten güt an vnser obgenanten Herren oder irs Chellner willen vnd haizzen an alz geuär. Täten wir dez ichtz, daz wir ichtz von dem obgenanten güt verchawften oder versätzten, daz hat chain chraft vnd ist tod vnd ab vnd sind dann sein vngolten, vnd weliher lay chrieg oder Recht wir dar vber gegen in auf hueben vber dy obgenanten punt, daz haben wir allez verlorn vnd vnser obgenant Herren gewunnen. Dar vber zu einem vrchund vnd stätichait gib ich vorgenanter Hanns der Pirichinger mein hawsfraw vnd vnser eriben den obgenanten vnsern genadigen Herren den Chorherren ze Pazzaw den prief versigilten mit meinem anhangundem Jnsigel, allez daz stät ze pehalten, daz oben an dem prief pegriffen ist. Geben nach christi gepürd drewzehen Hundert iar vnd dar nach in dem Sechs vnd Sibentzkistem iar, An Sand Merteins tag.

Source Fulltext: OÖUB 9 (Wien 1906), S. 157-158