Jch Haertneid der Elter Chuchler vergich offenlich mit dem brief für mich mein Hausfrawn vnd all mein Erben vnd tun chunt allen den, die in sehent oder horent lesen, daz mich der Erwirdig fürst mein Genaediger Herr Her Pilgreim Erczbischof ze Salczburg, Legat des Stuls ze Rom alles des, des er mir für mein dienst, Purchüt, Sold oder Schaeden von der Pfleg wegen ze Obernperg vntz auf Hewtigen tag schuldig worden ist, gaentzleich bezalet vnd furderlich an allen abganch ausgericht hat, Also daz ich noch mein Erben, noch diener noch ander yemant von vnsern wegen, darvmb hintz im seinem Gotshaus, seinem (!) Nach chomen, noch hincz allen den iren, dhain ansprach noch vordrung nimmer mer haben sullen, wellen, noch mugen, noch in dhainen wegen schaeden zuziehen weder mit recht noch an recht an geuaer. Daz lob vnd versprich ich mit meinen trewn staet ze haben vnd ze volfüren, an geuaer, vnd dar vber ze vrchund gib ich den offen brief versigelten mit meinem anhangundem Jnsigel, der geben ist ze Salzburch, do nach Christes gepurd ergangen waren, dreutzehen Hundert iar, darnach in dem Sechs vnd Sibenczigistem Jar an sant Clemententag.

Source Fulltext: OÖUB 9 (Wien 1906), S. 164