Ich Symon der Zänkel, ich Chunrat Hyrsmägel vnd ich Vlreich Mörold, Tu^on chund vnd vergehen offenleich mit dem prief allen den die in sehent, ho^ernt oder lesent, vmb die missetat, so wir getan haben, dar vmb vns der Edel Erber Herr Her hainrich von Waltse Hauptman ob der Enns in seine vanchnüzze swärleich gehabt hat, dar aus vns Erber Herren Ritter vnd Chnecht, vnd ander vnser vreund ertaydingt vnd ab erpeten habent, jn der mainung alz her nach mit worten an dem prief verschriben vnd wegriffen ist, Von erst so haben wir gesworn stark ayd zden heyligen, daz wir von der Tät vnd vanchnüzz wegen fu^erbaz nimer niemant dester veinter sein sullen, weder Landen noch lawten, noch allen den dhaynen, die mit wo^erten oder mit werchen daran schuldig gewesen sein, wie die genant werden oder sein in dhainer weis, Vnd wo wir daz indert vberfu^eren gevärleich oder ander yemant von vnsern wegen, dez wir mit zwain erbern mannen über weiset würden, so sey wir mit zwain über sagt vnd ver v^ertaild in gleicher weis alz ander Schedleich lawt, die mit Recht veru^ertaild vnd über wünden werdent vnd sullen noch mu^egen wir dhains gelaitz dhainer vreyung an dhainer stät nicht geniezzen, wie die genant mag werden, Vnd der sach gelüb vnd Tayding geben wir den prief mit gu^etleichem willen über vns ze v^orchund der versigelt ist mit der Erbern Herren, Ritter vnd Chnecht anhangunden Jnsigel, die Hernach an dem prief verschriben vnd wenant sind, von Erst Hern Hannsen Maürln, Hern Wernhartz dez Aystershaimer, Hern Vlreichs von Rörbach vnd Wölfflein dez Sinczendorffer, Hansen des Schyfer, Vlreich dez Geltinger, Wernhartz dez Chamrer ze lintz vnd Fridrich des Chraftz vnd Albeygen vnd Jo^ergen der Rüedlinger, Chunrat Chienast, Tybolt Pernawer, Ludweig Chamrer, Tömel Alhartinger vnd Jörgen dez Praitwiser aller anhangunden Jnsigel, die si durch vnser pet willen vnd durch fristung vnsers lebens an gelegt habent in an schaden, Darhinder wir vns verpinten mit vnsern gesworen ayden alles daz stät ze haben vnd ze volfüren daz an dem pri^ef ist verschriben, Der gebn ist nach Christ gepurd dreutzehen Hundert jar vnd dar nach in dem Siben vnd Sibenczkisten jar an sand Mathiastag dez Heiligen zwelifpoten.

Source Fulltext: OÖUB 9 (Wien 1906), S. 203-204