Ich Janns der Chrael vnd ich Anna sein Hausurow, ich Mert der Streytgreym, ich Fridreich der Prawn von Newnburch chlosterhalben vnd ich Margret sein Hausvrow, vnd alle vnser Erben, wir vergehen — das wir vnuerschaidenleich gelten sullen dem Erbern Hannsen dem Poschen zu den zeiten des Hochgeborn fürsten Herczog Albrechts ze O^esterreich Chuchenmaister, vnd seinen Erben zwaintzig phunt wienner phenning, die er vns in gu^eten trewn ze fuedrung willen berait gelichen hat, der wir Jn vnd sein Erben oder wer vns an i^err stat, mit dem brief mont, vnuertzogenleich richten vnd wem sullen an sand Michels tag, der schierist chu^emt. Tu^en wir des nicht, Swas Si denne derselben phenning fu^erbas schaden nement datz kristen vnd datz Juden, oder wie der schad genant ist, das ainer, der den brief zaigt, bey seinen trewn vngesworn gesprechen mag, denselben schaden mitsambt dem Houbtgu^et, su^ellen wir Jn gentzleich ablegen vnd widerchern, das lu^eben wir Jn ze laisten mit vnsern trewn an geuer. Si su^ollen auch Houbtgu^ot vnd schaden haben ouf vns vnuerschaidenleich vnd auf allem vnserm gu^ot, das wir haben in dem Lannde ze O^esterreich, oder wo wir es haben, wir sein lebentig oder tod, vnd daru^eber so geben wi^er Jn den brief zu einem warn vrchu^end der Sach versigilten mit mein obgenanten Mertenn des Streytgreyms angehangem insigil, vnd mit des Erbern manns insigil Chunrats des Schonnawer zu den zeiten des egenanten Hochgeborn fursten Hertzog Albrechts ze Osterreich Kamerschreyber der der sache getzeug ist mit seinem insigil vnd wannd wir ich egenanter Hanns der Chrael vnd ich Anna sein Hausurow, ich Fridreich der prawn vnd ich Margret sein Hausurow selber nicht aigener insigeln haben, So verpinden wir vns mit vnsern trewn an geuer vnder der vorgenanten insigiln alles das stet ze haben vnd ze laisten, das vor an dem brief geschriben stet der geben ist ze Wienn nach Christes gepu^ert drewtzehen hundert iar darnach in dem Syben vnd Sybenczgistem iar des nechsten Phincztags in der andern Wochen nach Ostern.

Source Fulltext: OÖUB 9 (Wien 1906), S. 228-229