Ich Jans der Smid Wolfhartz sun von Reichtzhaim, Jch Katrey sein Hausfraw, veriehen fu^er vns vnd für alle vnser Erben offenleich —. Daz wir von vnsern gena^edigen Herren Herrn Heinreich von Volchenstorf probst, Christan Gold Techent vnd Capitel ze Matze daz Gu^ot daz gelegen ist ze Reichtzhaim mitten in dem Dorf pei dem Valltor, daz der vorgenant Her Christan chauft hat auf seinen Jartag, Geworfen haben mit aller zuegehörung. vns vnd allen vnsern Erben. Mit der beschaiden daz vnser ains alle zeit hau^oslich dar auf sitzen schol, Vnd schu^ollen ja^erchleich i^ors Gotzhaws Oblayer ze Matze. da von raichen geben vnd dienen an alle ir mu^o fu^enf vnd sibentzig phenning. Saltzburger di denn gib vnd gäb sind an sand Jacobs tag ze der dienst zeit. Vnd fünfzig phenning wyenner der selben mu^ens an sand Michelstag der dar nach schierist chu^omt, Sybentzig Ayer ze Ostern an alz vertziehen. Vnd schullen Jarchleich vnser ains, daz auf dem Gu^et gesezzen ist in i^ors Oblayer gewo/andleichen stift mit zwain Hu^oner vor dem selben i^orm Oblayer erscheinen. Vnd daz selbe Gu^et dem selben Oblayer aufgeben vnd wider enphahen an allen vnsern schaden. Vnd schol vns des nichtz i^erren, weder Schawer. Pises. vrleug, Lantz prest, noch dhainerlay ander sach wie die genant ist oder wa^or. Wi^er volpringen vnd geben den vorgenanten dienst als vorgeschriben stet. Vnd schu^ollen vnd mu^ogen auch di obgenant gnad vnd recht auf dem selben gu^ot weder versetzen noch verchauffen noch verchummern noch dhainen tail daraus an ir willen haizzen vnd gunst. Gescha^ech es dar v^ober, daz schol chain chraft nicht haben vnd in ze sein an allen schaden (!) Wa^or aber daz daz wi^or oder vnser Erben auf die vorgenant ta^og nicht ga^eben Ja^orchleich, welichs daz vnser ains vnder vns wa^or, oder ichtz über fu^oren. daz vor an dem Prief geschriben stet, so sei wir vnd alle vnser Erben vnd nachomen veruallen von allen vnsern rechten. di wir dar auf haben, vnd mu^ogen si denn daz selb Gotzhaus vnd Capitel ze Matze allen i^orn fru^om da mit geschaffen alz mit andern irs Gotzhauses freyn Aygen. an alle vnser vnd vnser Erben freunt vnd Helfer. vnd nachomen wider red vnd irrung. vnd schol es in denn. von vns. vnd vnsern Erben ingeantbu^ort werden willichleich. pauleichs vnd stiftleich mit Haus, vnd mit Hof ze Holtz vnd ze veld. mit sam vnd mit Ardhew vnd mit aller zugehorung. alz si es vns willichleich. habent ingeantbu^ort vnuärleich. vnd schullen si daz haben auf aller vnser hab wo wir di haben. vnd becho^emen vor allen andern lau^oten vnd geltern. Si schullen auch des vorgenanten gu^otz vnser herren vnd gewer sein alz lantz recht ist in Matzear gericht. da es inne gelegen ist. Es ist auch ze merkchen. daz vnuertzigen der vorgenanten handelung, Jch vorgenant Jans vnd ich Katrey sein Hausfraw mit willen der vorgenanten Herren vnd Capitel zu Matze vnd nach vnser pesten freunt rat vnserm vorgenanten lieben Vater Wolfharten dem Smid haben di trew getan. daz wi^or im daz obgenant güt ze Reychtzheim lazzen haben zu sein ains lebttagen. halbs. mit allen nu^otzen. sam wir es von dem Gotzhaus haben. Also. daz er halb gu^olt vnd dienst da von raichen vnd dienen vnd geben schol. alz si vor geschriben sind an allen vnsern schaden. Vnd wann vnser obgenanter vater stirbet. so ist es vns vnd vnsern Erben. ledig waren an alle seiner Erben vnd nachomen ansprach. vnd widerred. Daz daz also dem vorgenanten vnd Capitel zu Matze vnd irn nachomen von vns vnd vnsern Erben vnd nachomen stät vnd vntzebrochen beleib ewichleich geb wir in den Prief versigelten mit der Erbern Jansen diweil Phleger ze Matze, Chunrat des Schötinger di zeit Richter do selben anhangunden Jnsigeln in vnd allen i^orn Erben an allen schaden, di sey durich vnser vleizzigen pet willen. dar an gehangen habent. Dar vnder ich mich vorgenanter Ians der Smid vnd ich Katrey sein Hausfraw verpinten fu^or vns vnd fu^or alle vnser Erben vnd nachomen mit vnsern trew^on an Aydes stat. alles daz sta^ot zu haben, daz oben an dem Prief geschriben stet, Vnd ich vorgenanter Wolfhart vnd ich Ma^otz sein Hausfraw. veriehen auch fu^or vns vnd fu^or alle vnser Erben vnd nachomen sta^ot ze¹⁾ halten meinem vorgenanten sun Jansen, seiner Hausfraw Katreyn vnd allen i^orn Erben vnd nachomen vnd dem Gotzhaws ze Matze vmb meins vorgenanten Wolfhartz leibgeding alain vnd niemant mer, allez daz oben an dem Prief geschriben stet. Wi^or veriehen auch paidev, Ich vorgenanter Wolfhart vnd ich Matze sein Haus fraw. daz wir die obgenant Iansen Phleger, Chunrad den Scho^etinger vleizzichleich vmb irev Jnsigel gepeten haben. in vnd allen iren Erben. an allen schaden. Dar vnder wi^er vns auch verpinten mit vnsern trew^en an aydes stat alles daz sta^et zu haben. daz oben an dem Prief geschriben stet. wan wir aigener Jnsigel nicht enheten. Der handelung aller vnd daz wi^or alle seu paideu vleizzig. vmb irev Jnsigel gepeten haben. Des sind zeug. Marichart der Aychperger Puriger ze Matze. Fridrich der Guglär, Heinrich Vischau^effel. Hainrich der Nu/azzel mayer von Perig. vnd ander erber lau^ot genu^og. Der Prief ist geben nach Christi gepu^ord Dreutzehen hundert Jar dar nach in dem Syben vnd Sybentzigistem Jar des na^echsten Eritags nach sand Jacobs tag.

Source Fulltext: OÖUB 9 (Wien 1906), S. 291-293