ICH Charel Geytzensteter auf der O^ede, mein Hausfrawe vnd alle vnser baider erben, die wir haben oder gewinnen, wir veriehen offenleich an dem Brieff vnd tuen chund allen den, die in ansechent oder ho^erent lesent, das wir mit wolbedachtem muet vnd gutem willen aller vnser erben nach vnser nachsten vnd pesten freunt Rat zu der zeit, do wir ez wol getuen mochten, Recht vnd redleich haben ze chauffen geben vnser Guet zu O^ebern weternperge gelegen in Gallnewnchircher pharre vnd in Vreinsteter gericht, das vnser rechts Rittermaezzigs aygen gebesen ist, vnserm lieben Genedigen herren hern Ruegern von Starchenberch von wiltperch vnd allen seinen erben vmb fu^enfczehen pfunt wienner phening, der wir gancs vnd gar von in verricht vnd gewert sein zu rechten taegen an allen vnsern schaden vnd haben in dasselb vnser guet geben auz vnser nucz vnd gewer in die iren mit allen den Eren, nuczen vnd rechten, vnd darczue geho^erent oder dauon cho^emen mo^egen ze dorff, ze holcz, zu vellde, versucht vnd vnuersucht. Wir sein auch des egenanten Chauffs vnd guts ir rechter gewer vnd fu^erstant fu^er alle ansprach, wo in dez notdurfft geschicht mit recht, als chauffs vnd des Landes Recht ist ob der Enns. Gieng in aber an der gewerschafft icht ab, mit recht, wie getanen schaden si des nemen, den ir ains bey sein trewn an ayd vnd vngeswo^eren gesprecht (sic) mo^echt, denselben schaden allen su^ellen wir in gancs vnd gar abtuen vnd widerchern an alle widerrede vnd sullen si das haben auf vns vnsern trewn, darczu auf aller vnser hab, die wir haben oder lassen, wie die genant oder wo die gelegen ist, auf wasser oder auf land, versu^echt vnd vnuersu^echt. Das in daz also fu^erbas stet vnd vnuerchert beleibe, darv^eber geb wir in den Brief zu einem waren vrchunde der sache versigelt mit meins egenanten Charleins Geitzensteter von o^ede angehangem jnsigel vnd zu pezzer sicherhait vnd zeugnuzz mit vnserr lieben vettern Charleins des Geitzensteter von Vellstorff vnd Hermans des Geitzensteter vnd mit des Erbern Albrecht des Tanpechen die zeit phleger ze der Vreinstat mit ir aller angehangen jnsiglen versigelt, die si daran gehangen habent durch vnser vleissigen gebet willen in vnd allen iren erben an schaden. Der Brief ist geben, do man zalt von Christs geburd vber drewtzehenhundert iare, darnach in dem Syben vnd Sybentzigistem iare an dem heiligen weinacht abentt.

Source Fulltext: OÖUB 9 (Wien 1906), S. 364-365