JCH Rainprecht der polhaimer, ich philipp vnd ich Marchel geprueder sein Su^en veriechen vnd tu^en kundt fur vns vnd all vnser frewndt Offenlich mit dem brief allen den, dj in sechnt, hornt oder lesennt, vmb dj vancknus, darin ich vorgenanter philipp der polhaimer gewessen bin in des Edln Wolgeboren Graf hainrichs von Schawnberg (sic), daraus mich Erber Ritter vnd knechtt vnd auch mein lieb frewnt mit Jrn vleissigen bet pracht habent also, das wir vnd all vnser frewndt vnd helffer vnserm vorgenanten Herrn graf Hainrichen vnd allen sein Erben von der selben vancknus wegen, wie sich dj vergangen hatt, vnd auch allen den Jren, wie dj genannt sind, sy sein Edl oder vnedl icht dester veinter sein vnd auch wir vnd all vnser frewndt vnd helffer wider sew Nymermer nichts tun sullen von der sach wegen, wie das yemant erdencken mag jn kainerlay weis vnd haben auch des vnserm egenanten herrn Graf hainrichen ainen aufgereckten ayd hintz gott vnd hintz den heiligenn gesworen: Ob wir das indertt v^eberfu^eren oder yemant von vnsern wegen, als obenn an dem brief geschriben ist, so sullen wir manaidig sein vnd sullen auch darumb all Herrn, Ritter vnd knechtt vnd all vnser frewndt vnd helffer vnser veint sein vnd sol vnns tu^en als andern manaidigen, ob wir pruchig wurden, des wir got nicht getrawn, vnd dj punt vnd gelu^eb also statt vnd vnzuprochen beleiben, Des geben wir obgenant polhaimer den brief versiglt mit vnserm anhangunden Jnsigl vnd auch zw ainer waren Zewgnus mit der Erbern Ritter vnd knechtt vnd auch mit vnser frewndt Herrn seiboltz vnd her Ortolf der wolfflstorffer, Hartneiden dem Hautzenpegkchen, Gotfrid des Sintznperiger, Niclas des Juden dj zeitt phleger zw Marspach vnd perichtoltz Jm hag auch anhangunden Jnsigl, Darunder wir vnns auch verpinten mit vnsern trewen in aydes weis alles das statt zu halten vnd ze volfu^eren, das oben an dem brief geschriben stett an alles geuar, Der geben ist Nach kristi gepurdtt drewzechenhundertt Jar vnd in dem achtt vnd sibentzigisten Jarenn am Suntag sand Thomans tag des heiligen zwelifpottenn.

Source Fulltext: OÖUB 9 (Wien 1906), S. 541-542