Wir Albrecht von Gots gnaden Herczog ze O^esterreich, ze Steyr, ze Kernden vnd ze Krain Graf ze Tyrol. zc. Bechennen vnd tu^on chunt offenlich mit disem brief. daz wir den erbern vnsern getrewen: den Pu^orgern gemainlich ze Ens, dar vmb daz si, vnd dieselbe vnser Stat ze Ens, dester paz, auf nemen, vnd gepezzert werden, die gnad getan haben, vnd tu^on auch, Swas man wein oder getrayd, dahin pringet, daz das chain gast ainer dem andern nicht verkauffen sol, nu^or allain vnsern Purgern daselbs ze Ens, Vnd swas auch Geste sind die von obern Landen, mit gewand, dahin komend, daz die dasselbe gewand auch dhainem anderm Gast, nicht hingeben, noch versneyden, Svnder si sullen das verkauffen den obgenanten vnsern Pu^orgern, an alles geuer. Mit vrchund dicz briefs. Geben ze Wienn, an Mittichen vor dem Svntag als man singet Letare ze mitter Vasten. Nach krists geburdt dreuczehen hundert Jar, dar nach in dem Newn vnd Sybenczigisten Jare.||
dominus dux per Johannem de tierna.

Source Fulltext: OÖUB 9 (Wien 1906), S. 593