Ich Eberhart von Winkchel, korherr ze Pazzaw, vergich —, daz ich durch pet willen des ernwirdigen vater in got, meins gena^edigen lieben Herren, Hern Albrechcz Bischofs ze Pazzaw meinen Hof, vnd swas dartzu^o gehört, gelegen do selbs ze Pazzaw, ze nachst bey der wer, vnd ru^ert an weilent maister Hannsen von Scherding seliger geda^echtnu^ezze Hof, dem erbern Herren Hern Hannsen von Regen, meinem mit korherren doselbs ze pazzaw, vnd die zeit pfarrer ze Lincz, geben han, vnd gib auch wizzentleich mit dem brief, in dem rechten, alz ich den gehabt vnd ru^ebchleich besezzen han, Also beschaidenleich, daz derselb Her Hanns, den vorgenanten Hof, mit aller seiner zu^egeho^erung, fu^erbas sein lebta^eg, vnuerchumerten sol innehaben vnd besiczen, ru^ebchleich, an alle irrung, Wenne aber der selb Her Hanns mit dem tod abget, des got lanng nicht verhenng, so sol der vorgenant Hof vnd swas dar zu^e geho^ert, nach desselben Hern Hannsen tod, an mich, vnd an meinen vetern, Albrechten von Winkchel, auch meinen mit korherren doselbs ze Pazzaw, ob wi^er oder vnser einer den selben Hern Hannsen v^eberleben, vnd ob wi^er paid denne verschaiden wa^eren, an ander Winkchler ainen, oder mer, die vnsers gesla^echtz vnd die auch korherren doselbs ze pazzaw zü der selben zeit sind, vnd ob denne auch dhein Winkchler, vnsers gesla^echtz, der korherre do¬selbs ze pazzaw, zü derselben zeit wa^ere, nicht lebte, vnd auch nach aller Winkchler, die korherren ze pazzaw sind, tod, vngeuerlich, alz schi^erist, die all mit dem tod abgent, an daz ernwi^erdig Capitel, des Tu^oms ze pazzaw, widerhennt geuallen, an alle widerred vnd irru^eng, so, das nach des offt genanten Hern Hannsen tod. dhein sein frewnt, noch ander niemand von seinen wegen hincz demselben Hof, vnd swas darzü gehört, nichcz ze sprechen sol haben, oder gewinnen, weder mit recht geistleichen oder werltleichen rechten, noch an recht dheins wegs, an alles geuerd. Jch pin auch des obgenanten Hofs, vnd swaz dar zu^e geho^ert, in dem rechten, vnd in der mainung, so oben beru^ert ist, desselben Hern Hannsen gewer vnd scherm, fu^er all ansprache alz ich ze recht sol, Mit vrchunde des briefs, besigelten mit meinem angehangem insigel, Vnd mit des ernwirdigen Herren Hern Hannsen von Scherffenberch, die zeit Tu^emprobst doselbs ze Pazzaw, auch angehanngem insigel, der sein insigel durch meiner vleizzigen gepet willen, ze zeugnüzze der obgenanten Hanndlung, vnd sache, an den brief gehangen hat, im doch an schaden, Geben doselbs ze Pazzaw, an dem Eben-weichtag, Nach kristi gepu^erde, drewczehen Hundert iar, vnd in dem Newn vnd Sibenczigisten iare.

Source Fulltext: OÖUB 9 (Wien 1906), S. 550-552