Ich Chunrad der Neileichedel die zeyt vnder Richter zu Alten ötting, mein Hawsfraw vnd alle vnser erben veriehen —, daz vns Wernhart der Smit vnd Hanns sein bru^eder zu^e Taeting — versetzt habent ir zwö Hüb gelegen zü Taeting genant die Nidern Hu^ob vmb zechen pfw^end Regens(burger) pfenning, die wir trewlichen berait gelichen haben, Also mit der beschaiden, daz wir die selben Hu^eb inne haben sullen vnd niezzen — alz lanng vntz daz si die vorgenanten zwo Hu^eb vmb die egenanten zechen pfwnd Regensburger pfenning, die dann gib vnd gaeb sind von vns darumb ledigent vnd lo^esent. Wir veriehen auch swann daz ist daz si köment vnd üns oder swem die zwo Hu^eb die selben zeit stent, Gebent zechen pfwnd Regensburger pfenning alz vor geschriben stet, So sullen wir oder swer si inne hat vön vns dem vorgenanten Wernhart dem Smit vnd Hannsen seinem bruder vnd iren erben losu^eng niht wider sein noch versten in dhainerley weys. Taeten wir dez niht. Swelhen schaden si dez dann na^emmen mit, wie daz wär den süllen wir in abtu^en vnd mu^egen auch dann vmb iren dienst auf den vorgenanten zweyn Hu^eben wol pfenten in aller der mazz alz ein ieglich man vmb sein gu^elt durch recht pfenten sul — vnd swaz wir oder swer die selben Hu^eb von vns inne hat mit in daru^eber wellen chriegen oder rechten ez wär mit geistlichen oder mit werntleichem gericht daz sullen si alle behabt haben vnd wir ez gein in verloren vnd dar u^eber so geben wir in den kagen brief zu einen waren vrchu^end der sach versigilten mit Hern Hannsen dez Schelmperger Jnsigil, den wir dez vleizzig gepeten haben daz er sein Jnsigel an den brief gelegt hat im vnd seinen erben an schaden, darunder wir vns verpinden mit vnssern trewen allez daz staet ze haben vnd volfu^eren daz vor an dem brief verfchriben stet. Dez sind Taydinger gewesen vnd sind auch zewg der gepet vmb daz Jnsigel Chunrad von Niderndorff vnd fridrich von pachman vnd Wernhart der Smit von perg vnd andre von Newnaichen vnd ander erberg la^ewt genug. Datum anno domini Millesimo CCC septuagesimo nono, dez freytags vor vnser frawn tag zu Lichtmezz.

Source Fulltext: OÖUB 9 (Wien 1906), S. 572-573