Ich Chadolt von Wissen vnd mein eleiche Hausfrav vnd all vnser Erben, di wir haben oder noch gewinnen, wye di genant mugen sein, wi^er vergehen ofenleich mit dem brief allen di in sehent oder horent lesen daz wir Recht vnd Redleich vnd mit wolwedachtem mu^et vnd gesuntem leib czu der czeit da wir ez wol getu^en machten nach vnser nachsten vnd pesten freunt rat willen vnd gunst geben haben czu einem ewigen selgrät vns vnd vnsern fadern vnd nach chomen vnsern sellen cze hail vnd cze Hilf daz gu^et daz genant ist auf dem ettenperg daz pernharten, da vernher czu den czeiten ist auf gesessen vnd ist gelegen in Bassenberger gericht vnd in Sand petringer phar vnd ist vnser Rechtz freis aygen gewesen vnd daz haben wi^er geben dem erbern beschaiden Herrn Herrn Mertein czu den czeiten pharrer czu Rorbach i^em vnd allen seinen nachchommen, di nach im pharrer werdent czu Rorbach, daz haben wi^er im geben mit allen den eren rechten vnd nuczen vnd dar czu^e gehornt oder da von bechoment cze hocz (!), cze veld versu^echt vnd vnuersu^echt also beschaidenleich, daz si vns mi^er vnd meinem vater Charlein von wysen vnd allen vnsern fadern vnd nachchommen ein ewigen iartag wegen sullen in den nachsten acht tagen nach aller Heiligen tag auf welhen tag si aller pest mu^ogen des nachtz mit der vigili vnd fi^er cherczen vnd des morgens mit sexs messen eine gesungen von vnser fravn, die ander gesungen von allen sellen vnd die fi^er gesprochen auch von allen sellen vnd schol auch der pharrer den gesellen geben fi^er vnd czaincz (!) phenning vnd dem su^elmaister acht vnd dem mesner fi^er vnd acht von den cherczen di dez nachcz prinet pey der vigili vnd des morgens pey den messen prinnet vnd schol auch vnser gedenchen al suntag vnd al vnser fadern vnd nach chomen. wär aber daz wär aber daz (!) der iartag nicht wegangen wi^erd, alz oben geschriben stet, so hat sich der czechmaister vnd di pharleit ¹⁾ czu Rorbach follen gewalt dez for genanten gu^etz vnter winten vnd alz daz wegen da fon daz oben geschriben stet vncz alz lang daz der pharrer alz daz wege daz oben geschriben stet an dem Prief. Wi^er haben auch, ich forgenanter chadolt vnd mein Hausfraw vnd erben daz fargenant gu^et auf dem eitenperg auf geben dem pharrer czu Rorbach vnd seinem nach chomen, also, daz wi^er noch ny^empt von vnsern wegen dar nach nymermer sprechen sullen vnd waz wi^er dar nach sprechen mit weltleichem Recht oder geistleichem daz haben wi^er floren vnd der pharrer wehabt an alz recht chri^eg vnd i^errung. daz di red also stet vnd vnczeprochen beleit (!) gib ich forgenanter Chadolt den offen prief mit meinem Anhangundem Jnsigel, ich vnd mein Hausfraw vnd alle vnser erben alz ze stat haben daz oben geschriben stet an dem prief vnd dar czu czu einer pessern sicherhait vnd czeugnus mit meines lieben Herrn vnd sweher Tanchwarcz dez Herleinsperger Anhangundem Jnsigel czu der czeit phleger czu Schollenberch vnd mit meines liebn ohaim Vlreichs dez Streitwicz Anhangundem insigel vnd mit dyetreichz dez walchz an ahangundem insigel vnd mit Tanchwarten dez Hauczenperger Anhangundem insigel vnd mit Ruegers des Tobler anhangundem insigel, di si al fu^emf an den prief gehangen habent durch vnser fleizigen pet willen in vnd allen i^ern erben an schaden czu einer warn czeugnus vnd sicherhait der sach, der prief ist geben, da man czalt von Christi gepu^erd drev czehen Hundert iar vnd dar nach in dem nevn vnd Svbenczgen iar an sand Johans tag cze Sunibenten.

Source Fulltext: OÖUB 9 (Wien 1906), S. 653-655