IIch Hanns Graewl, ich Alphart Tawbner, ich Engelprecht Wiltperger, ich laewtel Wolfenraeivter, ich Georg Chlauban, ich Hanns Dahpekch, ich Nicla Dahpekch vnd ich Nicla Paemchircher wir vergehen offenlich mit dem brief, daz der Erwirdig fürst vnser genediger Herr Her Pilgreim Erczbischof ze Salzburg, Legat des Stüls ze Rom vns von der dienst wegen, die wir im getan haben in dem chrieg, den er mit Wilhalm dem frawnberger vnd seinen Helffern ze Bayern gehabt hat, alles Soldes, dez er vns, vnsern Schüczen vnd dienärn dar vmb schuldig gewesen ist vnd aller schaeden, die wir in seinem dienst, vncz auf hewtigen tag genommen haben, wie die genant sind gaenczleich ausgericht vnd fürderleich bezalt hat, Also daz wir noch ander yemant von vnsern wegen dar vmb hincz vnserm vorgenanten Herren von Salzburg seinem Goczhaus vnd nahchömen, noch hincz allen den iren nimmer mer dhain ansprach noch vordrung haben schullen noch wellen in dhainen weg an geuär, weder mit recht, noch an recht, daz loben vnd versprechen wir mit vnssern trewn an aydes stat vnd dar über ze vrchund geben wir obgenant disen brief versigelten mit des vesten Ritter Herrn Friedrich Gleinczer vnd Hannsen des Strewn aigen anhangunden Jnsigeln, der daz durch vnser vleizzigen pet willen an den brief gehangen hat, im vnd seinen erben an schaden, vnder den obgenanten Jnsigeln wir vns all egenante verpinden, für vns vnd die vnsern allez daz stät ze haben, vnd ze volfüren daz an dem brief verschriben ist, der geben ist ze Salzburg, an Sampcztag nach sand Andrestag, nach Christi gepürd drewczehen Hundert, Jar, dar nach in dem Newn vnd Sybenczikistem Jar.

Source Fulltext: OÖUB 9 (Wien 1906), S. 755-756