Wir Graf Hainrich zu Orttenberch, wir fraw Agnes Gräuynn zü Orttenberch, wir Graf Alram vnd wir Graf Görg ir paider Sün Grauen zw Orttenberch bekennen —, daz wir vnz gütlich vnd frewntlich verrichtt vnd veraint haben, auf ein gancz end mit dem Edeln wolgeborn Lantgrauen Johansen zum Lewtenberg, Graue zu Hals. mit seiner Hawzfrawn allen iren eriben vnd nachkömen vmb all awflaüff, stözz, zwayung, misshelung. vodrung. vnd schuld, di zwischen vns vnd ir gewesen sind. wi di genant sind. oder wi sich di verloffen habent, bis auf den hewtigen tag. Also daz wir, vnser Hawzfrawn vnd all vnser eriben vnd nachkomen. in redlich vnd recht verschawfft haben. all vnser recht. vordrung vnd ansprach, di wir gehabt haben. oder gehaben möchten, zu allen den Herschefften, Lant vnd Lawten vnd mit namen zw allem dem. daz der Edel wolgeborn Graf Lewpolt von Hals säliger. vnser lieber Öhaim. hinder im gelazzen hat. wi das genant ist oder wo daz gelegen sey. nichs ausgenomen, vnd der selben Herschefft aller Lawt vnd güt verczeihen wir vnz vnser Hawzfrawn all vnser eriben vnd nachkomen. daz wir noch nieman von vnsern wegen. dhain vodrung ansprach nymmermer darnach gehaben sullen mit recht noch an recht. gaistlich noch werltlich in dhein weiz. Noch nach allem dem. daz vnser egenanter Öhaim von Hals sälig hinder im gelazzen hat. wi daz genant sey. ausgenommen der Herschefft, Lawt vnd Güter: Lenberch, Pawngarten, Tann, Harbach, Ganchoven auf der Pwnnach gelegen, vnd den Hof zu Mämmyngen mit dem zehent, alz den ieczw Ott der Polnchouer inne hat. vnd nach dez brif lawtt. den wir von dem obgenanten Lantgrauen Johansen, seiner Hawzfrawn, eriben vnd nachkömen dar über haben. Wär auch, daz wir über di vorgenanten Herschefft icht brif hieten, ez wär von eribschaft, schuld oder pfantschaft wegen, di in zü schaden kömen möchten, vnd vnz zw frumen, an den obgenanten Herschefften, schulden vnd [753]||
||
753||
gütten. di süllen wir in widergeben trewlich an allez geuär. Würd aber der brif dhainer verhalten oder vergessen, wo der fürbaz für kom, der sol wider den brif dhain kraft noch macht haben vnd sol fürbaz tod vnd ab sein an aller stat. vnd der obgenanten Su^en vnd berichtigung sind taidinger gewesen di vesten Ritter Degenhart Hofer zu Werd, Hanns Gewolf zum Degenberg, Hanns Satelpoger zü Liechtenekk vnd Baldbin1) der Gerolt Lantschreiber in Nider Beyern. Vnd dez zu einem warn vrkünd vnd ewigen stätichait geben wir dem vorgenanten Lantgrauen Johansen seiner Hawzfrawn vnd allen iren Erben vnd nachkömen den brief versigelten mit vnser aller anhangunden Jnsigelen vnd mit vnser vorgenanten vier taydinger anhangunden Jnsigeln, di si zu einer gedächtnüzz vnd zewkchnüzz nach vnserr fleizzigen pet zu sambt den vnsern an den brif gehangen habent, in vnd iren eriben an schaden. vnd dar under sich vnser liber Sün vnd prüder Graf Wetzet zu Orttenberch verpindet mit seinen trewen, zu sambt vnz vnder di obgenanten Jnsigel allew, allez daz stät zü haben vnd zu volfüren, daz oben an dem brif verschriben stet, wann er zu der zeit begrabens Jnsigels nicht enhet. vnd di weil auch der Jnsigel ains oder mer an dem brif gancz vnczebrochen ist, so sol er kraft vnd macht haben vnd vnuerworffen sein an aller stat. Der brif ist geben nach Kristi gepürtt Drewchehen Hundert Jar vnd darnach in dem Newn vnd Sibenczigisten jar an sand Andre tag dez heiligen zwelifpoten.

Source Fulltext: OÖUB 9 (Wien 1906), S. 752-753