ICH Ru^eger von Starichenberch der Ju^enger Vergich vnd tun kunt allen den, die den brief lesent oder ho^erent lesen, Daz ich meiner hausfrown frown Elzbeten hern Cristans Tochter des ha^eusla^er von Rezzing, dem Got gnad, gegeben han Sechshundert phunt wienner phenning ze rechter Margengab nach des Landes recht ze O^esterreich vnd han auch Ir mit aller meiner Erben gu/tern willen vnd gunst mit wolbedachtem mu^et vnd nach meiner frewnt Rat die vorgenanten Sechshundert phunt gemacht vnd mach recht vnd redleich mit dem brief, Von erst die zwayhundert phunt wienner phenning, die mier die erbern Geistleichen La^ewt der Probst vnd der Conuent ze Hertzogenbu^erch gelten su^ellen mit allen den nu^etzen vnd rechten, so der brief sagt vnd lauttet, den ich von jn darvmb han, den ich nydergelegt han zu der vorgenanten meiner hausfrown handen nach vnfer payder frewnt Rat; Darnach vierhundert phunt auf vier Ho^efen vnd aller irer zu^e geho^erung gelegen ze Merkchendorf v^ender Schalapurch in Lostorffer Pharr vnd auf ayndlef phunden wienner phenning vnd aynem Emmer Smaltzs vnd ayndlefthalbem metzen Habern geltes gelegen ze Lu^etzelwerd, die mein Satz sint fu^er vierhundert phunt wienner phenning von meinem O^ehim hern Albern von Zelking von Schalapu^erch mit allen den gu^elten, diensten, nu^etzen vnd rechten, als mier dieselben gu^eter stent, als der brief sagt vnd Lauttet, den ich von dem egenanten meinem O^ehem von Zelking darvmb han, den ich auch nydergelegt han zu der vorgenanten meiner hausfrown handen nach vnser payder frewnt Rat Also mit aufgenomen worten, ist, daz wir miteinander Chind gewinnen, Darauf su^ellen nach vnser payder tod die vorgenanten Sechshundert phunt erben vnd geuallen. Wer aber, daz wier mit einander nicht Chind gewunnen vnd daz mich die vorgenant mein hausfrow v^eberlebt oder ob wier miteinander Chind gewinnen vnd daz die auch abgiengen vnd sturben ee denn dieselb mein hausfrow, des Got nicht well, dennoch so sol si die vorgenanten Sechshundert phunt innhaben, niezzen vnd nu^etzen vnuerchumert vntz an iern tod, als Margengab vnd des Lanndes ze O^esterreich recht ist, vnd denn nach ierm tod so su^ellen dieselben Sechshundert phunt herwider geuallen auf mein nechst Erben, darauf si denn ze recht erben vnd geuallen su^ellen an allen chrieg. Vnd sein auch ich egenanter Ru^eger von Starichenberch vnd all mein Erben der vorgenanten Sechshundert phunt auf den obgenanten zwain Stukchen der vorgenanten frown Elzbeten meiner hausfrown Recht gewern vnd scherm fu^er alle ansprach, als Margengab recht ist vnd des Lanndes recht ze O^esterreich. Wer aber, daz Ir an denselben Sechshundert phunden icht abgieng mit recht, daz su^ellen ich vnd mein Erben Ir alles aufrichten vnd widerchern an allen iern schaden Vnd sol si daz haben auf allem vnserm gu^et, daz wier haben in dem Lannde ze O^esterreich oder wo wier es haben oder hinder vns lazzen, wie daz genant ist. Vnd wenne die vorgenanten zwayhundert phunt von dem Probst von hertzogenbu^erch geuallent vnd bezalt werdent, so su^ellen dieselben phenning der vorgenanten meiner hausfrown wider angelegt werden nach vnser payder frewnt Rat, als Margengab vnd des Lanndes ze O^esterreich recht ist in dem rechten, so vor geschriben stet. Vnd also ze gleicher weyse ob der vorgenant mein O^ehem her Alber von Zelking oder sein Erben den vorgenanten Satz losten, die weyl die vorgenant mein hausfrow Lebt, so su^ellen Ir dieselben vierhundert phunt auch wider angelegt werden nach vnser payder frewnt Rat, als Margengab vnd des Lanndes ze O^esterreich recht ist in dem rechten, so vor verschriben vnd begriffen ist. Vnd daru^eber so gib ich Ir den brief ze einem warn vrku^end der Sach versigilten mit meinem insigil vnd mit meins Vettern insigil hern Ru^egers von Starichenberch des eltern vnd mit meiner O^ehemen insigiln hern Pu^erchharts vonn Wynden vnd des vorgenanten hern Albers von Zelking, die ich des vleizzichleich gepeten han, daz si der Sach gezewgen sint mit iern anhangunden insigiln. Der brief ist geben nach Kristes gepu^ert drewzehenhundert Jar, darnach in dem Achtzgistem iar des nechsten Phintztags vor Sant Jorgen Tag.

Source Fulltext: OÖUB 9 (Wien 1906), S. 833-835