Wir Albrecht zc. Bekennen vnd tu^on kunt offenlich mit disem brief, daz wir vnserm getrewn vnd besunder lieben Hertneiden dem Degenberger zem Weizzenstain an seinem solde vmb den dienst, so er mit sampt seinen gesellen vnd dienern vns getan hat, vnd noch tu^on sol, wider Graf Hainrick von Schoumberg, schuldig sein vnd gelten sullen fünfczehen hundert phunt phenning, Vnd darumb haben wir verseczt vnd setzen auch wizzentlich mit dem brief die Purg vnd Herschaft ze Pewrbach mit allem dem. so darzu^o geho^ert, Leuten vnd gu^etern, wie das genant vnd wa es gelegen ist, als wir das von dem von Schawnberg in vnser gewalt bracht vnd gewunnen haben, Also daz die der egenant Degenberger vnd sein erben von vns vnd vnsern erben in Satzes weis an abslag der nucz innehaben vnd niezzen sullen vnd mugen, alz lang vncz wir oder vnser erben denselben Sacz von in oder iren erben geledigen vnd erlo^esen, mit den egenanten fünfczehen hu^ondert phunden phenning, Wenne auch wir oder vnser erben da mit die Losung an Si vordern, Sa sullen si vns der stat tu^on vnd gehorsam sein an alle widerred vnd vercziehen vngeuerlich. Auch sullen wir vnd vnser erben desselben Saczes sein vnd seiner erben gewer vnd scherm sein an allez geuer. Wer aber daz er Jn ze swer wurde, vnd si den furbaz nicht haben wolten, wann si das denne an vns oder vnser erben vordernt, So sullen wir den darnach innr drin Manöden von in ledigen vnd in ir gelt richten. Teten wir des nicht, swas si des denne furbaz scheden nemen, die sullen wir in abtragen gar vnd genczlich mit sampt dem obgenanten Haubtgu^ot an allez geuer. Ez sol auch der egenant Degenberger, oder sein erben, oder wer die egenant Purg vnd die Stat ze Pewrbach von iren wegen ye innehat, vns vnd vnsern erben vnd vnserm fürstentu^om ze O^esterreich damit getrewe vnd gewertig sein vnd vns die offen haben zu allen vnsern notdurften, vns vnd die vnsern, die wir dar zu^o schaffen, darin vnd darauz ze lazzen vnd auch darinne ze enthalten, wenn vnd wie oft vns des durft geschicht wider allermeniklich nieman auzgenomen an alle widerrede, doch an iren merklichen Schaden vngeuerlich. Mit vrkund dicz brifs, Geben ze Velde vor Schowmberg an vnser frawn abend ze der Schidung im Augst Anno domini Millesimo. CCCo. octuagesimo.

Source Fulltext: OÖUB 9 (Wien 1906), S. 877-878