Wir Albrecht von Gotes gnaden herczog ze Osterreich ze Steyr ze Kernden vnd ze Krain graf ze Tyrol etc. bechennen offenlich mit disem gegenwurtigen brief, daz wir vnd all vnser helffer vnd diener einen frid aufgenomen haben mit graf Hainreichen von Schawmberg vnd allen seinen helffern vnd dienern vnez auf die nechstchunftigen Phingsten an geuerd jn solicher beschaidenhait, daz wir einen tag mit im laisten vnd suchen sullen zu Mitterrvasten schierist ze Lyncz oder ze Wels, da sullen wir zu demselben tag schiken drey vnserr frevnd oder vnserr herren vnd da engegen sol graf Hainreich von Schawmberg auch drey seiner frevnde oder seines rates auf denselben tag bringen vnd sullen da den sechsen alle vnser scheden, gebresten vnd zuspruche fürbringen vnd wes die sechs da mit einander vberain werdent sprechent oder erfindent mit mynn oder mit dem rechten, da sullen wir bey beleiben vnd genczlich volfüren, vnd wes die sechs vberain nicht mochten werden, da sol vnser lieber bruder herczog Leupolt obman sein, vnd swaz der dann sprichet oder erfindet mit der mynn oder mit dem rechten, da wellen wir genczlich bey beleiben vnd dasselb volfuren. Ez sol auch der vorgenant graf Hainreich von Schawmberg vnd alle sein helffer vnd diener an allen den geslozzen, gütern, mautten vnd nuczen, die wir innhaben, vnd an den dreyen pasteyen, die wir vor Schawmberg geslagen haben, vns dhein irrung noch inuell tun in dhain weise, alz lang der vorgenant frid wert. Wer aber das, daz vns an den dreyen pasteyen icht schadens geschech, da sol vns der vorgenant graf Hainreich von Schawmberg vor vnser vnd den sechs spruchleuten gerecht vmb werden, daz er dhainerlay schuld daran weder mit reten noch mit teten nicht habe an geuer, so sol er des vnengolten sein an seinen eren vnd gut. Auch bechennen wir, waz die sechs spruchleut vnd vnser lieber bruder herczog Leupolt der obman sprechent oder erfindent, daz wir das genczlich stet halden vnd volfuren wellen, alz vor an dem brief begriffen vnd geschriben ist. Darumb haben wir im zu furphant vnd zu geisel geseczt zwelif tausent phunt wienner phenning; ob das were, daz wir nicht stet hielden die taiding vnd spruch, die dann die sechs vnd der obman sprechent vnd erfindent, so sullen wir dem egenanten graf Hainreichen die zwelif tausent phunt phenning wienner auf den nechsten sand Johanstag ze Sunwenden beczalen in vnser stat ze Lyncz vnd sullen im dieselben phenning gelaitten gen Schawmberg. Teten wir aber des nicht vnd beczalten in nicht auf den vorgenanten tag, so haben wir mit vnserm lieben getrewn Otten von Zelking geschafft vnd geschiket, daz er mit vnser vest Nevmburg vnd allen geslozzen gulden vnd nuczen, alz er sie von vns innhat in phandes weise, dem egenanten graf Hainreich von Schawmberg gewarten sol mit der losung alz vns selber. Darczu slahen wir im die egenanten zwelf tausent phunt auf Newmburg vnd alle die geslos, gulte vnd zugehörunge, wie die genant sein, alz die Ott von Zelking von vns innehat, vnd sullen denne das losen von dem egenanten graf Hainreichen von Schawmberg vmb das gelt, das Ott von Zelking darauf gehabt hat, vnd vmb die offtgenanten zwelif tausent phunt wienner phenning, ob wir der veruallen, alz vor geschriben stet. Auch haben wir in vnsern frid vnd richtigung genomen vnser lieb öhem die herczogen von Payrn vnd alle die iren von des saczes wegen Wildegg alz vnsselben. Auch sullen das goczhaus vnd die stat ze Pazzaw vnd alle die iren, die von Regenspurg vnd die von Choln in dem vorgenanten frid vnd berichtigung sein. Were auch, daz dhain vnser diener oder helffer den vorgenanten frid vberfür vnd vbergriffe, das sullen wir vnuerczogenlich in einem monad widertun vnd widercheren an geuerd. Teten wir aber des nicht, zwaz dann die sechs spruchleut vnd vnser lieber bruder herczog Leupolt der obman darumb erfindent vnd sprechent, das sullen wir genczlich stet haben vnd volfüren. Auch ist geredet worden, daz man auf paiden seitten allen geuangen teg geben sol vncz auf die vorgenanten Phingsten. Wir sullen auch fleizzichlich vnsern lieben bruder herczog Leupolten mit vnser erbern botschaft bitten, daz er mit vns zu dem obgenanten tag zu Mitterrvasten chöme vnd vns auf paiden seitten entschaid, alz vorgeschriben stet. Auch verpinden wir vns mit vnsern trewen, daz wir den obgenanten tag suchen wellen mit vnsern frevnden oder vnsern herren, alz oben geschriben stet. Teten wir des nicht, so sullen wir der velle veruallen sein, alz auch oben in dem brief geschriben ist, von der auzspruch wegen, es wer dann, daz vns ehafte not irrte an geuer. Vnd des ze vrchund geben wir disen brief besigelten mit vnserm anhangenden insigel, der geben ist ze Wienn an Mitichen vor sand Agnesen tag nach Kristes gepurd dreuczehenhundert iar darnach in dem aynen vnd achczigisten Jare.

Source Fulltext: OÖUB 10 (Wien 1933), S. 6-7