Wir graf Hainreich ze Schownberch bechennen mit dem offen brief, alz bald daz geschiecht, daz vns her Ott von Zelking antwurt den brief, alz der brief sagt, der in vnserr porgen brief begriffen ist, so sullen wir dem hochgeborn fürsten vnserm herren herczog Albrechten von Osterreich etc. vnd auch den porgen den brif hin wider antwurten, den wir||
von in haben, vnd sullen auch den obgenanten vnserm herren einen brief antwurten mit vnserm anhangundem jnsigel, der da lautten wird, ob daz geschehe, daz Newnburch mit aller irr zugehörung, alz di her Ott von Zelking inne hat, in vnser gewallt chäm von des valles wegen nach der brief sag, di wir ze beiden seitten gegen ein ander geben haben, so sullen dennoch di gesloz vnsers obgenanten herren herczog Albrechts von Osterreich etc. offen gesloz sein, auz genomen vnsrer merchleichen schäden. Mit vrchund des briefs versigelt mit unserm aufgedruchtem insigel, geben ze Schownberg an Samcztag nach sand Pauls tag, alz er bechert ward, anno etc. LXXX primo.

Source Fulltext: OÖUB 10 (Wien 1933), S. 13-14