Ich Janns der Smid mein hausfraw vnd alle vnser erben vergehen vnd tun chunnd allen den, die den prif sehent, horent oder lesent, vmb die czehen phunt wienner phening, so die erbern purger vnd pruder in sand Johanns czech geschafft vnd auch gegeben habent durich ir seli haill willen lemptigen vnd totten hintz dem heyligen Gaist dacz dem spital ze Lyncz, der selben phening habent si vns gelihen vir phunt phening durich vnser vleizzig pet willen, vnd haben in dar vmb versaczzt mit gerichcz hannt vnd mit aller statt vnser haws gelegen vor dem obern tor ze nachst pey der prukk vnd Andre dez Smid hawz mit allen den rechten eren vnd nuczzen vnd dar zu gehort versucht vnd vnuersucht ledig vnd frey, da nicht mer auf leit wenn ayn phenning vnsern gnadigen herren den herczogen in die puchsen vnd auch ayn phunt gelt, daz vor dar auf leit, daz wir alle jar da von dienen schallen dem erbern herren hern Petern die zeit chapplan dacz dem heyligen Gaist in dem spital ze Lyncz an sannd Jorigen tag. Wir schullen in auch von den obgenanten vir phunt phenning alle jar järchleich raihen vnd geben ayn halb phunt geltz zwir in dem jar zv sand Michels tag vnd ze Weinachten zu yedem tag sechczikch phenning gelcz, vnd als offt wir in daz purchrecht versitzzen, so haben sich als offt alle div wanndel vnd recht auf daz obgenannt haws veruallen, die auf purchrecht gehorent nach der stat recht ze Lincz. Wir haben auch vollen gewalt alle jar losung ze Weinachten acht tag vor oder hin nach vber acht tag vnd swann wir wellen losen, so schullen wir daz verdint purchrecht da mit raihen vnd geben dem erbern herren hern Petrein dem chapplan dacz dem heyligen Gaist die obgenanten wir phunt phening vnd die selben vir phunt phening div sol er, oder swer nach ym chvmfftichleich chapplan wirt, dacz dem heyligen Gaist wider anlegen nach dez erbern rates ratt zv Lynncz. Wir sein auch dez vorgenannten sacz auf dem obgenanten haws ir gewer vnd furstannd wo in dez nott geschicht, also der stat recht ist ze Lyncz. Gyeng in an der gewerschaft icht ab oder daz in dhain chrieg da von auf er stunnd mit recht von wem daz war oder swie sich daz fügt, den schullen wir in awsrichten vnd richtig machen gancz vnd gar. Tätt wir dez nicht, swittann schaden si dez dar vber nement, den schullen wir in gancz vnd gar ablegen vnd wider cheren an alle widerredd vnd schullen si daz haben auf vns vnd auf vnsern trewn vnd darzu auf aller vnser hab, swo wir div haben auf wazzer oder auf lannd versucht vnd vnuersucht, wir sein lebentig oder tod. Daz die redd statt vnd vnczbrochen beleib, dar vber zu einer urchunnd geben wir in den prif versigelten mit dez erbern beschaiden Nicla dez Guelher, zden czeiten richter vnd mauter ze Lynntz, vnd mit Hainreich des Losleins purger daselbs anhangunden insigeln, div si habent angelegt durich vnser vleizzig pet willen zu einer czewgnuss in vnd iren erben an schaden, dar hinder wir vns verpinden mit vnsern trewn allez daz statt ze haben vnd zu volfüren, daz oben geschriben stet, wann ich obgenanter Janns selber zder czeit nicht aygenz insigels gehabt han. Der prif ist geben nach Christes gepurd drewczehn hundert jar vnd darnach in dem drew vnd achczkisten jar am Mitichen nach oller mann Vaschanng tag.

Source Fulltext: OÖUB 10 (Wien 1933), S. 166-168