Wir Albrecht von Gots gnaden herczog ze Osterreich ze Steyr ze Kernden vnd ze Krain graf ze Tyrol etc. embieten vnserm lieben getrewn Eberharten von Kappellen vnser gnad vnd allz gut. Wir emphelhen dir ernstlich, daz du vnser purger gemainlich ze Ens vnd auch das spital daselbs bei iren leuten vnd gütern, die si hieuor auf dem lande habent, vogtest vnd versprechest vesticlich vncz an vns. Denn vmb den vberuang, den Musch der Jud ze Ens getan hat, emphelhen wir dir ernstlich, daz du darauf die eltisten von der stat furest, die das beschawen, vnd wie die gedenken, daz das von alter herkomen sei, daz du schaffest, daz man ez auch noch dabei beleiben lass. Wan wir das gar ernstlich mainen vnd wellen. Geben ze Wienn an Suntag nach Gotsleichnam tag LXXXIII. Dominus dux per Waldner.

Source Fulltext: OÖUB 10 (Wien 1933), S. 184-185