Wir Albrecht von Gottes genaden hertzog ze Osterreich ze Steir ze Kernden vnd ze Krain graf ze Tirol etc. bekennen vnd thun kund offenlich mit dem brief, das wir mit pillicher betrachtung angesechen vnd bedacht haben dj lautter frewndtschafft trew vnd dienste, die hieuor vnsern voruodern hertzogen zw Osterreich säligen gedächtnuse vnd vnns geschechen sind von den edlen vnd wolgeborenn den grauen von Schawnberg vnd der wir vnd vnnser nachkomen hinfür in künftigen zeitten vnns versechen wellen vnd sullen von dem edlen graf Hainreichen zw Schawnberch vnserm liebem ohaim vnd von sein nachkomen, vnd haben darumb vnd auch nach solichen frewndlichen vnd redlichen teydingen, die zwischen vnns vnd demselbigen vnserm ohaim nu gegenwurtigklich geschechen sind, auf ain newe stäte vnd lautter frewndtschafft vnd sune aller der misshellung vnd kriege, dj ettlich zeitt her zwischen vnns erstannden waren, mit guter vorbetrachtunge vnd nach rate vnsers rates demselbigen vnserm ohaim gelobt vnd geloben auch mit krafft des gegenwurtigen briefs für vnns vnd all vnnser eriben vnd nachkomen herczogen zw Osterreich, das wir jn vnd all sein eriben vnd nachkomen bey allen jrnn rechten gerichten briefen freihaitten vnd gnaden genadigklichenn beleiben lassen sullen vnd wellen vnd sy bej gleich vnd recht halten vnd schirmen getrewlich vnd vestigklich als vnnser getrewen man an alles geuar. Vnd bestätten in auch diselbigen brief wissentlich mit dem brief, vnentgolten doch aller der briefen vnd handtuesten, die vnnser vordern vnd wir bedenthalben vormals vnd auch nun gegeneinander gegeben haben, die bederseitt voraus bey allen irnn krefftenn peleibem sullen, vngeuärlichen. Vnd darüber zw vrkund geben wir den prief besiglt mit vnserm anhangunden jnsigl, der geben ist zw Lynncz an sannd Kholmans tage nach Kristi gepurd drewzechen hundertt vnd darnach jn dem drew vnd achczigisten jarenn.

Source Fulltext: OÖUB 10 (Wien 1933), S. 211-212