Wyr Friderich von Gotes gnaden burggraue ze Nurenberg vnd wir Johanns lantgraue zum Lewtemberg graue zu Hals etc. bekennen offenlichen mit dem brieue vmb alle die stesse mishellung vnd zweiung, die die hochgeborn fürsten vnd herren herczog Albrecht zu Osterreich etc. vnd herczogen Albrecht der Alte vnd der Junge pfallczgrauen bey Reyn herczogen in Beyern etc. von der mautt vff dem Schertenberg wegen, von der syben gut wegen, die die herschafft zu Newnburg vff dem Yn in dem lande zu Beyern ligen hat, von der freyen leut wegen genant die Buchheimer vnd auch von der leute vnd gut wegen, gesessen vnd gelegen vnter dem Schertenberg nyderhalbe der strassen vff dem Yn, vnd vmb sulche stosse misselung vnd czweyung, die Ott von Zelking zu Schöneck pfleger zu Newenburg vff dem Yn vnd Vlrich Camerawer pfleger zu Scherding yr beyder helfer vnd dyener von der vesten Einberg vnd der scheden wegen, die czwischen yn bederseyt geschehen sein, vncz her gehabt haben, dauon sie bederseit die hernachgeschriben sechs spruchleut darczugeben haben ygleicher drey vzz des andern rate darumb aufzusprechen vnd daz ze richten. Zum ersten hat herczog Albrecht zu Osterrich etc. drey darczu geben mit namen Hansen den Gewelf zum Degenberg, Albrechten den Nusperger zu Kalmberg vnd Hansen den Seelperger zu Lichteneck, so hat auch herczog Albrecht zu Beyern etc. drey darczu geben Markart von Tyrnstein, Steffann von Zelkingen vnd Rugern von Starkenberg, vnd auch bederseit vns obgenante beyde für einen obeman, warumb die obgenanten sechs spruchleute stossig wurden, daz wir dann selber genczlichen daruber auzsprechen sullen vnd waz wir daruber erfinden vnd sprechen, daz daz auch von yn bederseit iren erben vnd nachkomen stete vnd gancz gehalten vnd volfuret werde ongeuerde, als sie daz beyderseit gegeneinander verbriuet haben. Also haben die egenanten sechs spruchleute bederseit dicz recht vmb alle obgeschriben stück vnd artickel zu Passaw gesprochen vnd geurteylt vnd haben sich derselben artickeln vnd stuck mit iren spruchen vnd vrteylen geczweyet, daz sie weder eines noch keines artickels nicht vberein komen sein, als wir dez von yn bederseit ir versigelt vrteyl vnd spruchbrief haben. Also haben wir obgenante beyde hye zu Würczburg (mit) fursten grauen herren vnd ritter ratte daruber gehaben, den wir der egenant sechs spruchleut vrteyl vnd spruchbriue fürgeleget haben, nach derselben rate vnd weysung wir beyde miteinander uberein worden sein vnd sprechen daz zu einem rechten: Seint herczog Albrecht zu Beyern etc. sprichet, daz vor den zeiten, vnd den herczogen von Osterrich etc. Scherding versaczet warde, nye kein mautte vff dem Schertenberg gewesen sey vnd die freyen leute genant die Buchheymer vnd auch die leute vnd güter gesessen vnd gelegen vnter dem Schertenberg vff dem Yn nyderhalbe der strassen von alter gewonheiten vnd rechten alle czeit dem gepot gen Scherdingen noch gegangen seyn vnd die herczogen von Osterrich etc. dieselben mautte in dem sacze gemachet vnd die egenanten leute vnd güter yn zu geczogen haben, vnd herczog Albrecht zu Osterrich etc. her wyder sprichet, dieselbe mautte sey vor vff dem Schertenberg gewesen vnd die egenanten leut vnd güter haben sein vorfaren von alter herbracht vnd vff yn geerbet vor dem sacze vncz her, daz dann die obgenanten herren beyde der von Osterrich vnd der von Beyern vnuerczogenlichen||
vff den nechsten Eritag nach dem nachsten Pfingstage kumen oder iren ganczen vollen gewalt gen Passaw senden sullen vnd iglicher sein kuntschaft vmb alle obgeschriben artickele vnd stucke bringe, also daz die leut, die kundschafte sein, yetwederm herren beyde dem von Osterrich vnd dem von Beyern weder leut noch gut zinsen vnd waz sie kuntschaft darumb sprechen, daz sie die mit dem rechten mit iren eyden beweisen, als recht ist, dahin wir bede vff denselben tage kumen wollen oder vnsern gewalt dahin senden dieselben kuntschaft bederseit zu uerhoren vnd darnach daruber auzzusprechen. Wer aber, daz wir selber dahin nicht komen mochten vnd vnser eyner oder bede seinen gewalt dahin santen an vnser stat, waz kuntschaft dann derselbe vnser gewalt von beden seiten da uerhort vnd vfnymet vnd an vns bringet, darnach sullen wir dann selber aussprechen, wo wir sein, gleicherweys als obe wir die kuntschaft bede selber uerhöret hetten. Welcher aber von den obgenanten herren desselben tages nicht suchte, als oben geschriben ist vnd seiner kuntschaft dahin nicht brecht, so wollen wir oder vnser gewalt an vnser stat dannoch dez andern kuntschaft aufnemen vnd verhoren vnd darnach aussprechen, dabey ez furbas dann steticlichen czwischen yn bederseit iren erben vnd nachkomen beleiben sol ongeuerde. Wir bekennen auch, daz wir nach der egenanten fursten grauen herren ritter rate vnd weysung vmb Eynberg die vesten zu einem rechten sprechen, ist daz, daz Eynberg die veste in dem gericht zu Scherdingen gelegen ist, als dann die drey Albrecht Nusperger Hans Gewelf vnd Hans Soclperger darvber ausgesprochen vnd gevrteylt haben, als wir auch dez von yn ir versigelt vrteyl vnd spruchbrief haben, daz wir daz auch vrteylen vnd sprechen zu einem rechten vnd dez bey yn beleiben, daz furbas mer von beyden seiten iren erben vnd nachkomen auch stete vnd gancz gehalten vnd volfuret sol werden ongeuerd. Auch nemlichen vmb die drew vaz weyns, die Ott von Zelkingen Vlrichen dem Camerawer in einem sacz genomen sulle haben, sprechen wir vnd vrteylen daz zu einem rechten, ist daz, daz mit der kuntschaft, die bede obgenanten herren vff den obgenanten Eritag in den Pfingstfeyrtagen bringen sullen, beweiset vnd auzgetragen wirdet, daz kein mautt vff dem Schertenberg sein stille, daz dann der Zelkinger dem Camerawer dieselben drew vaz weins widerkeren vnd geben sol angeuerde. Wer aber, daz mit der obgenanten kuntschaft erfunden vnd beweyset wurde, daz die mautt vff dem Schertenberg furbas beleiben vnd sein solt, so sol der Zelkinger von der obgenanten dreyer vazz weins wegen dem Camerawer nichtes schuldig noch gepunden sein. Zu vrkunde, daz wir gesprochen vnd gevrteylet haben, als oben geschriben ist, geben wir den brief versigelt mit vnsern obgenanten beyder anhangenden insigeln, der geben ist zu Wurczburg am Mittwochen vor sand Gorgen tage nach Christi vnsers herren geburt drewczehenhundert vnd in dem vier vnd achczigistem jaren.

Source Fulltext: OÖUB 10 (Wien 1933), S. 246-249