Wir Albrecht etc. bechenen vnd tun kund offenleich mit dem brief, das wir vnserm getrewn lieben Reinprechten von Walssee haubtman ob der Enns gelten schullen vnd schuldig sein fümf tawsent phunt phenning wienner münzz, dafür er vns den satz ze Steyr ledig gelassen vnd den zu vnsern hannden geantwurt hat, vnd haben jm vnd seinen erben für die selben fümf tawsent phunt versaczt vnd setzen auch wissentlich in phanndes weyse vnser vesten vnd herschef ten ze Newnburg auf dem Jn, Wernstain, Newnfels vnd Valkchenstain mit allen jrn nutzen gulten zinsen mautten vnd allen andern zugehörungen vnd rechten, als dieselben herscheft von alter herkomen sind, also das derselb von Walssee vnd sein erben die egenanten vesten vnd herschefften mit den vorgenanten jrn zugehörungen für das obgenant gelt jnnhaben vnd niessen sullen an abslag der nücze in ains rechten wernden phands weise als lang, vncz wir oder vnser erben die von jn vmb die vorgenant summ phenning erledigen vnd erlosen. Wir verhaissen jn auch für vns vnd vnser erben, das wir sy da nicht enthawsen sullen noch wellen, sy werden denn vor der egenanten phenning gancz vnd gar bericht vnd beczalt, vnd sullen sy oder wer dieselben vesten vnd herscheft von jrn wegen jnnhat vns der losung stat tun vnd gehorsam sein an widerred vnd vercziehen, swenn wir sy der mit den obgenanten fumf tawsent phunden phenning mit einander vnd nicht ze ainczigen ermonen. Sy oder wer die obgenanten vesten von jrn wegen jnnhat, sullent vns auch damit warttent vnd gehorsam sein, vns vnd die vnsern darin vnd daraus ze lassen vnd darin ze enthalten wider allermeniklich nyemand ausgenomen, swenn vnd wie offt vns des not geschiecht, doch an jrn merkchleichen schaden vngeuerleich. Sy mügen auch die vorgeschriben fümf tawsent phunt auf den egenanten phennden mit vnserm gutem willen schaffen ordnen vnd geben jrn frewnden oder wem sy wellent den vnsern, die zu vnsern lannden gehörnt, also das dieselben die egenant summe gelts auf den obgeschriben geslossen haben sullen in phanndes weyse mit allen den pünten vnd artikeln, die dauor geschriben stend angeuer. Vnd der ze vrkund vnd sicherhait geben wir jn den brief mit vnserm grossen fürstlichen anhangundem jnsigil, datum in Lengwach die Saturni post exaltationem sancte Crucis LXXXIIIIo.

Source Fulltext: OÖUB 10 (Wien 1933), S. 275-276