Ich Chunrat der Schramel vergich offenlich mit dem brief vmb di vanchnuss, darinn mich daz lantgricht ze der Freinstat von jnczicht wegen gehabt hat, daz ich von desselben wegen hinder die hernachgeschriben vier pidermann gegangen pin, die ich fleizzichlich darumb gepeten han, daz si sich von meinn wegen vmb die sach annemen vnd zwischen mir vnd dem lantgricht darumb aussprechen, daz ist Chunrat Czinespan Fridreich Schaler Hainreich Frodnacher vnd Symon Lemperczagel. Nv habent si nach meinem willen aussgesprochen also beschaidenlich, daz ich egenanter Chunrat mein erben freunt vnd helfer die sach nymmermer euern sullen noch nyemant von der sach wegen dhain veintschaft tragen noch scheden nicht zuziechen sullen weder mit worten noch mit werchen noch in dhainer weis. Wer aber, daz ich oder sev daz yndert vberfuren, in welher mazz daz wer, des man vns mit einer gewissen beweisen möcht, so hat sich zuhant mein leib vnd mein gut in meines herren des herczogen von Österreich gwalt vnd aller seiner amptleut verfallen also, daz si damit, wo si mich ankoment, in welhem lannt herschaft oder gericht daz ist, mugen getun vnd handeln, wie sev verlust, an alle mein vnd anderr levt hindernuss vnd irrung, darczu so wer ich im vnd seinen amptleuten zu der herschaft gen der Freinstat veruallen zehen phunt wienner pfenning vnd han für dieselben zehen phunt phenning zu pargen versaczt mein f reünt vnd gsellen Niklein des Penczen svn von Haslach, meinen||
swager Hannsen von Penczendorf, Jeklein von Göske vnd Vllein von Göske, Mainreichen den Sewssenpekchen von Kemphendorf, Vlreichen Mayr von Gawschalczperg, Fridlein den Suner ab dem Sünsperg, Thömlein Albrechtz svn von Arnoltzperg, Chunczlein des Chüczagel svn von Zirnperg vnd Eberlein des Pieter aidem von Hag, des wir all vnuerschaidenlich, als wir yeczunt nach einander benant sein, vergehen vnd gehelen, daz wir für die egenanten zehen phunt pfenning parg sein warden mit solher beschaiden, geschech, daz der egenant Chunrat Schramel oder yemant von seinen wegen die vorgeschriben sach yndert vberfür swie sich daz füget, so sei wir all vnuerschaidenlich vnd ab ainem auf den andern der egenanten zehen phunt veruallen als vor gemeldet ist vnd sullen vnd mugen si ir von vns vnd aller vnserr hab bechomen, wie sev verlust vnd gut zymet; das ist vnser gutleicher will vnd wart. Vnd der sach aller zu einer warn vrkund vnd guter gedechtnuss gib ich obgenanter Chunrat Schramel für mich mein erben freunt vnd helfer vnd wir egenant pargen den offen brief besigilten mit der vorgenanten erbern Fridreichs des Schaler, Hainreichs des Frodnacher vnd Symans des Lemperczagel aller dreyer angehangen insigeln, wannd Chunrat Zinespan aigens jnsigels nicht enhet, die si durch vnserr vleissigen pet willen ze zeugnuss der sach an den brief gehangen habent in vnd allen iren eriben an schaden, darunder wir vns all vnuerschaidenlich, als vor benant sein, vns verpinden mit vnsern trewn an aides stat alles daz stet ze haben, daz in dem brief verschriben ist, wann (wir) diczeit aigner insigel nicht gehabt haben. Geben an nachsten Phincztag nach sand Jacobs tag nach Kristes gepurd drewzehenhundert iar vnd jn dem vier vnd achczigisten jare.

Source Fulltext: OÖUB 10 (Wien 1933), S. 266-267