Wir Albrecht von Gots gnaden herczog ze Österreich ze Steyr ze Kernden vnd ze Krain graf ze Tyrol etc. embieten vnsern getrewn dem richter dem rat vnd den purgern gemainlich ze Ens vnser gnad vnd alles gut. Als vnsers lieben herren vnd vatter selig herczog Albrecht vnd vnsers bruders herczog Rudolfs von Österreich selig maynung vnd will ist gewesen, also mainen vnd wellen wir ouch gar ernstlich, swas in der vorgenanten vnsrer stat ze Ens geschiecht, welicherlay daz sey, daz das daselbs in der stat ze Ens gericht werde. Welich gast ouch ainem andern gaste gelten sol, der mag in darumb in der egenanten stat ze Ens wol verpieten, vnd aufgehaben auf ain recht. Geben ze Lincz an Suntag vor Pangracii tag anno domini MCCCLXXXIIII.||
Dominus dux per Johannem de Tirnauia.

Source Fulltext: OÖUB 10 (Wien 1933), S. 253